《LonelyPlanet》曾經係最權威旅遊指南，不過早前居然有多個作者爆料，話因為公司畀唔夠錢出Trip，好多時文章都只係閉門造車，亂寫一通。出外靠Guidebook，但作者竟然將旅遊資訊當小說咁寫，嚇壞人！訪問來港遊客，有人直指《LP》介紹遊客去重慶大廈過夜，完全靠害。《LP》信唔過，有美國版米芝蓮之稱的飲食指南Zagat即將登陸，是否可成為明燈？
記者︰黃家欣
攝影︰陳盛臣、王文忠
Enzo（美國紐約）
搵食方法︰我鍾意自己四圍搵嘢食
最愛食肆︰紅螞蟻，不過唔係間間都好食，仲有銅鑼灣好多樓上Cafe，環境都好舒服！
孤獨星球嚇怕遊客
Zagat有美版米芝蓮之稱，在紐約得到Zagat最高評分，就等如米芝蓮三星地位，令餐廳飛上枝頭。不過街訪發現大部份來自歐洲、澳洲同亞洲遊客都未聽過Zagat，搵食仲係靠比較出名的《LonelyPlanet》，雖然有《LonelyPlanet》作者出書爆料話寫書時大話西遊，但仍然Fans遍全球，好多人都會喺出發前「溫書」，做足準備工夫，來自法國的Feron︰「我淨係識《LonelyPlanet》，都會信佢啲內容，而且出發前我已經可以買來睇，plan好會去邊！」不過來自美國的Enzo同Jennifer都異口同聲讚同鄉Zagat信譽可靠，又容易用，力踩《LonelyPlanet》信唔過，Enzo︰「《LonelyPlanet》真係好睇作者，有啲真係亂來，好似叫遊客去重慶大廈住，想嚇死人咩！即係你未去過非洲，我叫你去森林過一晚夜，簡直Crazy！」Jennifer更說俾《LonelyPlanet》老點過好多次︰「試過去《LP》介紹的餐廳，環境完全唔掂，行到去都唔想食，所以我唔會再信佢。」而Zagat係美國老字號，所以美國人一見到香港版Zagat都一定話會以此為參考。街頭訪問了25個遊客有多於50%都會睇Guidebook搵食，其餘的會問朋友、上網Research，還有自己四處碰搵食，Enzo話︰「嚟香港點都會搵到嘢食，無Guidebook都唔怕會餓死！」同意，好似多人排隊的食肆，通常水準都不會太差！
歐美澳組
Jennifer（美國加州）
搵食方法︰問朋友同睇Guidebook
最愛食肆︰昨天先到仲未發掘，不過好想去重慶大廈食巴基斯坦菜。
CamilleRedureau（法國）
搵食方法︰出發前已睇定《LP》
最愛食肆︰無。鍾意去旺角、銅鑼灣Shopping。
Claire（澳洲）
搵食方法︰問朋友
最愛食肆︰無。不過鍾意香港交通好方便﹗
Alexandra（德國）
搵食方法︰都係朋友帶我周圍去食。
最愛食肆︰紅螞蟻
Terry（澳洲）
搵食方法︰出發前已經上網和睇《LP》，睇定會去邊啲地方。
最愛食肆︰時代廣場的FoodCourt
Payntel夫婦（英國）
搵食方法︰睇Guidebook
最愛食肆︰我哋昨天去了Aqua食晚飯，個View靚到不得了！
亞洲組
SupaChai（泰國）
搵食方法︰出機場時會拎定地圖
最愛食肆︰SOHO的地道餐館
Chestine（新加坡）
搵食方法︰出發前已問晒朋友要去邊度食嘢，基本上無用過Guidebook！
最愛食肆︰鏞記燒鵝好好食myfavorite﹗
大橋美奈子（日本）
搵食方法︰睇旅遊局網站
最愛食肆︰去茶樓飲茶！
Thien（新加坡）
搵食方法︰上香港旅遊發展局網頁
最愛食肆︰大家樂
MarinaKamiya（日本）
搵食方法︰上網搵或者睇Guidebook
最愛食肆︰山頂天一菜好好食。
2,037卧底調查員
Zagat內的意見來自2,037個調查員，各以卧底身份到Zagat所列名單上的食肆進行測試，再從食物、環境、服務及價錢，四方面評分，最後再取平均分，及由編輯綜合各人意見。
當選Zagat最受歡迎食肆頭五位，除鏞記之外全部都係半島同洲際五星級酒店內嘅餐廳，又點會差得去邊呢。索性叫遊客自由推介一間最愛香港食肆，結果來自德國的Alexandra及紐約的Enzo都話鍾意紅螞蟻，Enzo︰「唔一定間間紅螞蟻都好食，銅鑼灣有間喺百德新街就麻麻（記者按︰百德新街紅螞蟻果然已停業），另一間喺霎東街先好食！」仲熟路過地膽喎！而在纜車站遇上日本遊客Marina同Yuri都讚山頂的中菜餐廳天一好，反而以上各遊客自選的心水餐廳則全部不入Zagat之列。始終五星級餐廳，有幾多遊客會試㗎。
與Zagat話事人對談
Zagat推出香港版，連話事人Tim同太太Nina像一對活寶貝，問擁有聖誕老人身形的Tim有幾鍾意食，佢拍拍個巨型肚腩，笑笑口說︰「你話呢？」Nina則在旁補充︰「其實當初就係因為我哋兩個都鍾意食，食完又會自己做筆記，又鍾意收集其他人的意見，慢慢變成一本飲食筆記簿，最初只係手作仔印出來派畀朋友，後來大家都覺得有得做，於是索性辭退本身律師的工作，全身投入搞Zagat。」但正式出版之後，二人就無再參與評分，Tim忽然正經地說︰「任何選舉，舉辦人都唔可以參與，否則就唔公平﹗」Zagat先喺香港搵一個飲食專家，起草一份餐廳名單，再透過律師樓、會計師樓等等用滾雪球方式搵願意參與評分的人士，Nina︰「因為無所謂PHdinTaste！所以基本上任何國籍、職業的人都會搵，除非佢同被評分的食肆有關。」原來評分員除以卧底身份進行測試之外，更加無酬勞，只在事後得到一本Zagat作為答謝。Zagat三十年來都抱絕對公開公平的態度，從不接受廣告，所以得以保存三十年來Zagat的貞節牌坊。
