李賽鳳嘅前夫羅啓仁噚日喺尖沙嘴開記者會，宣傳下月中推出嘅新書《雙面人生》，本書係寫佢同李賽鳳之間嘅瓜葛，包括婚外情以及性生活之類嘅話題，不過開記者會前就發生小風波，之前一晚記者收到通知話個記者會取消，但實情冇呢回事，所以一開始羅啓仁就解釋：「今日（即昨日）10點有人問我點解取消記者會，根本冇取消或推遲，我唔知個消息來源。」
「佢越告我越好」
羅啓仁話宣傳新書，但又帶咗四個人出嚟，包括女友汪小莉、佢間製作公司負責編舞嘅韓峰、曾經俾李賽鳳告誹謗嘅李星，仲有「衣櫃男」宗天意嘅同學李程，佢哋都幫口指證李賽鳳，話佢同宗天意有路，內容同以前講開嘅是非都差唔多。反而最有新意係羅啓仁承認同汪小莉拍拖，佢話：「關係幾好，上年慢慢開始，汪小姐取代李賽鳳所做嘅事，越做越精緻，無論對公司對個人，我冇嘢要遮擋，又唔係醜事。」
講到本書嘅內容，羅啓仁話：「世界太亂，我唔想寫得咁八卦，但有寫性慾、性生活話題，係寫事實，醫生角度分析，都有借題發揮。」怕唔怕牽涉私隱問題？羅啓仁話：「講我自己私隱，我講自己壞話，佢（李賽鳳）係名人做明星梗會俾人評論，佢越告我越好，仲多啲人睇，我寧願佢告我，相又係我自己影，冇版權問題。」至於分身家單官司，羅啓仁話繼續審理緊，佢話未知幾時有結果喎。
