馬主H在三十度炎熱天氣下，行經史丹利街，偶然伸手抹去額頭汗水，竟然撞跌副太陽眼鏡，太陽鏡左邊鏡片跌甩咗，呻氣之際，望到前面兩個舖位就有一間迦南眼鏡，於是走入去詢問可唔可以代為將塊鏡片攝番入鏡框度。夥計立即話得，態度溫文有禮，不消五分鐘，太陽鏡恢復原狀。香港啲眼鏡舖真係服務優良，代客人做一啲小事，從不收錢，馬主H遇上同樣事情唔止一次，冇法子唔向眼鏡舖業者鼓掌致意。
馬主H在迦南舖內係咁意望兩望，睇到有一行小字：始創於一九四三。好奇之下，馬主H問夥計：「真係咁耐？以前舖位喺邊呀？」夥計答：「以前就係喺呢個舖位！畀幾張舊相片你睇吓！」相片就係一九四三年嘅迦南眼鏡，東主林大衞。諗唔到多問一句，竟然發現一間佢自己個個禮拜都會經過而懵然不知嘅六十五年老舖。香港地，舖租昂貴，舊樓拆得就拆，好少會有一間二次大戰時開業，今天仍留在原來創業地方嘅老字號，陸羽都唔得啦，況且仲要間舖頭經營有方，生意可以維持到，先至可以。譬如馬主H經常去中環一間微型理髮店剪髮，師傅話入行六十年，一九四六年在《德臣西報》（即今日南華大廈，Jimmy'sKitchen所在地）對面，今日中匯大廈後面一間理髮店學師，一路做到現在，但一九四六年時嘅中環理髮店，如今安在哉？馬主H好驚嗰位老師傅隨時退休不幹，就要為理髮而頭痛咯。
六十五年原地老舖老字號，中環罕見。有時對身邊事物多啲研究吓，會發現一啲歷史趣味，譬如現時陸羽茶室所在地，就係孫中山推翻中國滿清皇朝時之《中國日報》原址，孫中山在《中國日報》出入，策劃顛覆中國政權。呢類歷史故事未必人人都知。聽退休政府律師Y講，講本地歷史故事嘅權威係丁新豹與蕭國健兩位。呢兩位先生應新亞校友會之邀，久唔久就做嚮導帶新亞校友團遊新界，講文化古蹟，團團爆棚，律師W話遲啲報名都入唔到團。丁新豹以前帶香港墳場旅行團都廣受歡迎，何況帶其他文化旅行團！蕭國健係已故名教授羅香林之入室弟子，對香港史素有研究。