國內零售業逃稅情況嚴重，好似酒樓食肆，明明埋單2000蚊，但向稅局交人手簽發嘅收據，填200蚊都夠膽；呢種情況喺酒吧、桑拿、Spa同運輸業都好普遍。不過你有張良計，我有過牆梯。
據國內軟件商浪潮投資者關係部經理介紹，佢哋公司有份參與製造嘅稅控收款機，喺北京海淀區餐廳做咗一年試驗，將餐廳收款機數據直接駁去稅局聯網或輸入智能卡，稅局對餐廳真實交易金額盡在掌握。據聞呢個試驗好成功，一年嚟來自當地餐廳嘅稅款急升20%，多咗幾千萬。家陣已經有7個城市嘅商店裝呢部機，國家計劃2010年底推廣到全國。
此外，為免中央企業高層私自更改合同金額中飽私囊，另一家國內軟件商中軟國際（8216）董事總經理陳宇紅話，國家國有資產監督管理委員會已經規定，中央企業涉及1000萬元人仔以上嘅項目，一定要開會決定，仲要紀錄喺中軟有份開發嘅防腐敗管理信息系統上，任何修改都要開會決定兼記錄在案。今勻想走私漏稅都幾難！