樸茨茅夫上周六捧走英足盃，最感觸嘅係領隊哈利列納、功臣簡奴。呢兩位仁兄參加決賽機會唔多，呢輯光輝一頁相集絕對係可一不可再㗎！
61歲嘅老列納係英超第2年老領隊，賽前大口氣話66歲嘅曼聯領隊費格遜都唔退，自己亦要繼續。今次終於教波25年來首次捧盃，亦助球隊攞到69年來首個錦標，難怪佢招積咁話：「當我引入簡奴，個個當我儍仔，家陣證明我冇入錯貨；來季仲要再次重遊溫布萊！」
點知老人家話音未落，有外國博彩公司就潑冷水，開出老樸下季英足盃衞冕賠率為34倍，一啲都唔畀面呢位1995年以來，首位捧英足盃嘅本土領隊。又難怪嘅，今季Big4巧合地一齊撻Q，仲要撞正對手係卡廸夫城，呢個組合再出現嘅機會率同李嘉誠攞綜援差唔多啫！
安格文唔肯道歉
入波英雄簡奴賽後話呢個係人生最好嘅時刻，當年佢打完奧運轉會國米，點知一驗身發現有心臟病，足球生涯幾乎玩完；前排又發現被財務顧問呃走640萬鎊（約9,920萬港元），搞到要賣屋當車抵債，所以今次捧盃有感觸都好合理。仲有，佢比賽當日出門口嗰陣，3歲大仔仔話一定要睇到佢入波，呢位廿四孝老豆完成任務，亦話要番屋企開P。簡奴𠵱家好等錢使，賽後講明希望續新約，老樸高層識做啦！
卡廸夫城門將安格文賽後就發牢騷，但唔係佢接波甩手，簡奴又點可以門前執雞呢？不過呢位芬蘭門將賽後堅拒道歉：「嗰傳中波唔易接，當時突然飄落地，其實後衞應該解到圍先啱！再講，場地又濕又滑，又係新波，罪不在我。我反而想問，點解前鋒把握唔到入球機會。」安格文點搵藉口都冇人會理，大家只會將佢當年效力維拉時接應界外球漏入龍門嗰球，連埋呢球一齊講，難洗底囉！
樸茨茅夫英足盃光榮篇
1898：成立
1929：亞軍
1934：亞軍
1939：冠軍
2008：冠軍