港股上周雖然成交不多，缺乏方向，但係每日都有唔同炒作對象，升幅榜固然日日有唔少股份大升，唔上榜嘅中價股亦有唔少，反映資金在無方向市中仍然相當活躍，積極搵落後炒賣對象。
上周五不少三四線或四五線股起動，中國仁濟（648）、中青基業（1182）、新創（1141）、中盈（766）等冷門股都有大成交炒上，而最神奇者則莫過於南興集團（986），幾個交易日股價升咗3倍有多，南興長期成交疏落，街貨唔多，好易藉貨疏炒上，胡亂撲入風險唔細。
相比一些不知名三四線，過氣基金股應該更加值得留意，如上周出現異動的勝獅貨櫃（716），曾是不少基金及大行的研究對象，但由於生產貨櫃呢個行業最受鋼鐵等原材料成本影響，過去一年股價由6.30元勁跌至2元多水平，市值無咗三分之二。上周五勝獅急升8%至2.41元，隨着航運業有復蘇迹象，博股價上番3蚊都大把水位。
恩利估值唔高
另一前基金愛股係太平洋恩利（1174），該公司上周三收市後公佈，旗下於新加坡上市的中漁集團截至今年3月底止首季業績，溢利4039.6萬美元，按年升32.6%，有佳績支持，恩利股價於上周四及周五即有反應，累積升近14%。恩利一向經營海產貿易，近年藉中漁涉足捕魚業，有上游業務支持更加值錢，事實上，集團現價PE僅6.5倍，預測PE只係5倍，估值一啲都唔高，惟股價卻層層落，現價比起舊年7月3蚊跌咗一半，只能怪市場口味改變，二三線股備受忽略。