長實何文田新盤半山壹號開售在即，自從佢哋嘅將軍澳首都管理費高達2.15蚊，貴過擎天半島而哄動全城之後，唔少人都好有興趣知道，呢個新盤嘅管理費又有幾貴？前兩日終於有料到，答案係每方呎2.9銀！
以最細四房單位二千餘方呎計，每月淨係管理費開支，就差唔多6000蚊，夠供層百零萬嘅細單位。
華華check過同區其他物業嘅管理費，04年入伙嘅君頤峰每方呎1.98蚊，96年嘅爵士花園同95年嘅賀龍居就每方呎2.1蚊，七八十年代嘅太子閣同埋皇冠閣，分別1蚊同1.4蚊。
長實解釋，佢哋係豪宅級，每個單位淨係廚廁同埋私人lobby嘅用料裝修，加埋已經438萬，不過，乜管理費唔係同物業管理質素掛鈎㗎咩？