遊戲勁過電影IronMan裝甲晒冷

仲諗住08第二季必屬《Batman》天下，點知死對頭Marvel《IronMan》勁收得，Game界自然食住上！月初推出PS3/XB360雙主機版本，故事唔使講梗係忠於原著，更出奇竟然有10款不同IronMan裝甲出現喺遊戲內，每次進化都有新面貌同強勁武器，玩過就知主角TonyStark的確係超變態軍事天才！

記者：陳國輝

電影劇情主導

如果睇咗Marvel漫畫版，可能會覺得遊戲劇情同原著有些少出入。事實上，遊戲版以電影為藍本，故事講述武器製造商天才TonyStark因一次意外，被恐怖分子綁架，更威脅佢必須研製一件可摧毀全球嘅超級武器，等佢哋能夠統治全世界。喺研發期間，主角發現其拍檔原來一直有暗中勾結恐怖分子，出售武器，於是佢嘔心瀝血研製咗第一部裝甲MARKI，為脫離險境之餘，仲想破壞恐怖分子嘅驚天陰謀。

■呢個鬍鬚佬造型，貌似電影版男主角羅拔唐尼。

■仲記得主角首次控制MARKI，呢幕喺遊戲亦有出現。

■TonyStark可謂足不出戶，在其L.A.住所內開發裝甲。

空戰多於地面

正因為劇情大部份都跟足電影，加上呢一隻係ActionGame，激鬥場面梗係精采啦！如果大家睇咗電影，就記得TonyStark一開波穿起套MARKI裝甲，除咗淨係識慢流咁行，連飛天都唔曉；但直到開發MARKII嘅時候，測試重點已經去咗控制飛行方面，之後大部份打鬥劇情更於空中發生！查實，遊戲亦以空戰為主，玩家首要學習點樣喺空中平衡身體，然後再掌握飛行方向，情況就類似電影中嘅TonyStark咁不斷撞板！學識飛行之後，再嚟就要練習瞄準目標發射武器，其實裝甲內隱藏咗瞄準裝置，Tune得準嘅話，話唔定更輕易擊敗敵人。

■裝甲能夠發射出極凍光線。

■要避開導彈追擊，又唔可以擊落美軍，好難玩！

■鎖定目標後就可以進行攻擊。

賺錢換新裝甲

電影中嘅TonyStark唔單止係個鑽石王老五，而且仲住喺山頂超級豪宅，唔使憂柴憂米，梗係可以專心一致咁研製裝甲啦！不過，遊戲主角剛好相反，佢窮到仙都唔仙，如果想Upgrade套裝甲，玩家就必須完成任務，賺錢幫自己升級！遊戲內特別提供一個裝甲升級介面，裏面有唔同機能屬性，例如生命機能Armor、攻擊系統Repulsors、能力系統PowerSystems、副武器AuxiliaryWeapons以及行動力嘅MobilityEnhancements。玩落確實係幾複雜，但如果想儲夠Level打大佬，咁都冇法啦！