拍音樂電影而撻着的孫耀威和楊秀惠，在無綫新劇《新網中人》中再度奉旨拍拖，今次楊秀惠更做第三者，介入孫耀威與楊思琦之間。不過孫耀威直言不介意用緋聞做宣傳，更想與楊秀惠有親熱戲。楊秀惠都同聲同氣表示預期有親熱戲份。
無綫新劇《新網中人》昨日在將軍澳電視廣播城試造型，焦點順理成章落在緋聞男女孫耀威和楊秀惠身上，楊秀惠更以大露背短裙示人，孫耀威當然讚不絕口，他說：「佢好戰鬥格呀！我哋唔係奉旨拍拖，大家都係以事業為重。不過我最初都唔知佢有份做，直到落實前一刻先知道。我本身冇所謂，咪當攞緋聞幫手宣傳囉！」
預咗有親熱戲
講到親熱戲，孫耀威笑笑口說：「我唔知道有冇親熱戲，但最好個個都有份。」死撐沒有抗拒合照的楊秀惠笑說：「做得第三者又點會冇親熱戲呀，我都同黃宗澤拍過床戲啦，電視尺度有限，所以有都唔怕。」楊秀惠還大發嬌嗔說：「我真係好介意人哋話我哋拍拖，搞到𠵱家得番唔識睇中文嘅人追我，其他人就以為我係佢女友。」
楊思琦今次在劇中以新形象示人，她說：「我入行咁耐都未試過剪咁短，𠵱家都唔係好習慣，我仲留起剪咗嘅十吋頭髮做紀念。」思琦更笑說：「我呢三個月都會夾喺孫耀威同楊秀惠中間，不過我會做慳電膽，會因應需要而發光。」
何傲兒抵得鬧
何傲兒有份演出新劇，她當初選美落敗，不入三甲似乎沒有損失，她說：「我都唔知點答喎！但係我有晒準備要捱夜同俾人鬧，就算俾人用粗口鬧都唔怕，咪當人哋塞錢入我袋。」
採訪：何慧斯
攝影：陳志嵐
