今年55歲嘅香港著名導演兼演員李修賢，一向畀人鐵漢嘅形象，但噚日馮仁昭聽到消息，話李修賢喺杭州拍嘢期間心臟出現問題，要即時送入當地醫院接受治療，原本醫生建議佢即刻做手術，但李修賢覺得香港醫院比較穩陣，點都堅持要返香港接受治療。噚日下晝，李修賢喺杭州返到香港，就即刻喺太太陪同下入咗浸會醫院就醫，聽聞醫生建議佢做手術同埋留院觀察。
入醫院檢查吓
噚晚馮仁昭嘗試打電話畀李修賢，問佢身體嘅情況點樣？佢話：「多謝關心啦，我冇事呀。」馮仁昭問佢噚日下晝係咪入咗浸會醫院，以及問佢心臟有冇事？李修賢即刻否認話：「我入去醫院做身體檢查、check吓啫！我冇事，身體好好，我做完檢查即刻出咗院啦！」
《公僕》攞影帝
李修賢過往擅於拍警匪片，多數係演差人角色，佢84年就憑自導自演嘅《公僕》，獲得香港電影金像獎影帝同金馬影帝，而執導電影就有《皇家飯》同《龍的傳人》等等。
