油價持續高企，的確困擾不少企業，即使幾隻內地石油股在高油價之下，業績增長也似有還無，可謂得個「桔」。
至於高油價對石油化工股打擊則更直接，好似儀征化纖（1033）繼去年度純利倒退45%後，今年首季亦由盈轉虧，淨虧損2714萬元人民幣。
儀征業績「見紅」，加上其股改方案屢遭否決，股改已變得遙遙無期，基本上冇乜誘因吸引散戶去炒，上海石化（338）情況亦一樣。不過，星俠留意到一個現象，約一個月前，儀征A股曾連番跌停板，A股價當時約5.2元人民幣，同期H股約1.55元。
揸儀征H股激氣
上周五儀征A股已彈上6.17元人民幣，回升近兩成，同期儀征H股幾乎冇升過，現價僅得1.58元，揸住H股認真激氣，再次證明炒AH折讓其實博唔過，咪睇見A股升，就以為H股同步上升。