神奇球隊公民，昨日在香港大球場舉行的聯華國際足總盃決賽，在破今季本地賽入座紀錄的近6,000名球迷見證下，以2:0擊敗和富大埔，創會40周年來首次贏得甲組賽事錦標。
公民足球隊在香港已有40年歷史，這支致力發展青訓的球隊，直至04/05年度球季才首度踏足甲組。短短4年間，公民由寂寂無聞，變成今天的足總盃冠軍，而聯賽亦僅屈居南華之後得第2，實可以「神奇」形容之。
班費只及南華三分一
今季班費只有300餘萬的公民，成就能媲美千萬大軍南華，可歸納為「土炮翻生」、「國援變身」、「外援對辦」及「上下一心」4大因素。先講本地球員，門將何國泉今季力挽狂瀾，後衞沈國輝助攻助守，兩人看似合作得天衣無縫，但實際上前者去季未能為港會護級，後者亦遭愉園放棄，加盟公民後始大打爭氣波。
國援方面，王選宏季初技驚四座，入球能力令人嘆為觀止。不過，王選宏季中已回歸大連實德，公民會長貝鈞奇表示：「球隊還有陳志釗、徐德帥等好球員，後者更已入籍；而來季再有元洋及鞠盈智可當本地球員用，兵源不成問題。」
近6,000觀眾破今季紀錄
公民外援主要來自非洲及巴西，其中尼日利亞的法圖斯，昨仗更獲選決賽最佳球員。季中加盟的巴西兵艾里奧及保連奴，迅速融入球隊，相信亦是公民捧盃的另一原因。公民教練廖俊輝賽後表示：「我們是一支注重整體的球隊，沒有王選宏或路蘭，隊友自然會多走一步。」
昨日賽事吸引5,925名球迷入場，打破今季本地賽入座紀錄。當中大部份為遠道而來的大埔擁躉，他們最終未能如願見證球隊捧盃，是因為公民陳志釗14分鐘一記「世界波」，以及祖爾84分鐘的「烏龍球」。
本報訊
今季甲組足球總結
賽事：聯賽
冠軍：南華
賽事：高級組銀牌
冠軍：東方
賽事：聯賽盃
冠軍：南華
賽事：足總盃
冠軍：公民
神射手：廸天奴（26球/南華）
花絮：外籍女球迷好吸引
噚日「夢幻決賽」吸引接近6,000觀眾入場，而最受注目嘅球迷，莫過於專程嚟捧公民巴西前鋒尼高場嘅一班外籍朋友（圖），女嘅着得性感男嘅玩得夠癲，但聽公民班主貝鈞奇口風，下季留唔留番尼高仲係未知之數。照咁講，下季呢班咁吸引嘅靚女未必會再嚟捧場，球迷肯定少咗眼福囉。
花絮：何國泉亂射激嬲阿姐
公民贏得創會以來第一個大型賽事錦標，賽後當然要影張威水相啦！但公民門將何國泉（藍箭嘴）唔知係咪因為贏波開心過頭，玩香檳玩到忘晒形，噚日着到靚靚影相嘅「阿姐」陳瑤琴（紅箭嘴）首當其衝成為受害者，俾香檳射到濕晒，難怪佢即刻喝住何國泉，叫佢唔好再玩！
花絮：廖俊輝望贏教練獎
公民教練廖俊輝帶領一支得300零萬軍費嘅中型班，獲得聯賽亞軍兼捧埋足總盃，成為今季最令人驚喜嘅教練；佢賽後都話希望可以贏埋最佳教練選舉，令佢嘅執教生涯可以留下最光輝嘅一頁。