先施錶行（444）嚟緊26號公佈年度業績，應該靚爆鏡，買定等炒業績。先施錶行主打FranckMuller手錶及配飾中港澳獨家代理，集團08年度頭三季（12月底止）純利就已經勁升兩倍到5087萬銀，兼且超越07年度純利4361萬銀，已經坐定粒六。呢期亞洲區經濟消費市道，仍然好暢旺，無點受外圍影響，斷估集團最後一季純利表現，繼續好標青。先施錶行08年度純利，係咁意翻半番到6542萬銀，預期PE都係講緊7倍單位數，加埋預期5厘息，真係吸引到痹。再中線少少睇，祖國大把高消費族，集團又係上邊品牌獨家代理，繼續肥仔水。
又喺星洲上市嘅控股「SincereWatch」，由上年5月到今年3月停牌時，股價一支箭，翻咗近一番，先施錶行同期打橫行，又係落後到爆。買先施錶行，博上番10倍PE，現價（1.15元）要升43%到1.64元。
亨泰長揸短炒都得
4月13號主打亨泰（197），當時股價1.18元，家陣head住近30%，再坐一會。買亨泰，利好基本因素及人仔升值等等受惠條件不變，多咗嘅係，呢期連日本股壇巨人邱永漢都睇好亨泰。邱生仲認為，亨泰未來有潛質變10倍升幅股。無邱生咁好耐性嘅，維持番上次目標價1.81元，即係亨泰08年度預期PE10倍水位，回報率50%。現價（1.5元）上車，短打回報率都講緊20%，已經有魚有肉。