早幾年迷你電單車（MiniBike）殺入香港，即吸引到不少貪新鮮的港人，包括以康宏晨曦為首的一班本地甲組球員；據聞高峯期時，差不多每周都拉隊到天水圍「鍊車」。今次就邀請了幾位已有一段時間「冇落場」的晨曦球員鍊番轉，他們稍經熱身，便高速飛馳及掟彎，相當型仔。
記者：曾雁平 攝影：王子俊
小記日前相約晨曦球員陳耀麟、羅志焜、利偉倫、鍾健希及朱兆基等玩車，大夥兒於操練後食過午飯，便到天水圍馮家圍的香港迷你電單車會內「鍊車」。
甫上車入彎即甩鏈
到場後，場地負責人便問：「需唔需要安排同事教佢哋點開車，同講解注意事項呀？」當他知道是他們足球員時：「係咪山度士啲隊友呀，佢哋早排成日嚟玩，佢哋好熟㗎，我哋淨係準備啲車就得啦！」
雖然一班晨曦兵已逾一年冇玩MiniBike，但難得有機會再玩，甫到場便急不及待戴上所需要的安全裝備，準備重拾玩車樂趣。
車身細細速度感強
可是今次借用場內的電單車時速最快可達50公里，但試了幾部也撻不着，其中鍾健希幾經辛苦成功撻着車準備走番兩個圈，怎知入了彎卻遲遲不見他出彎，原來途中甩鏈，結果要推車返回維修站。
採訪前聽聞利偉倫及羅志焜駕駛技術最佳，有傳前者曾與友人鬥車，只見他們經熱身後重新找回「鍊車」感覺，摸清座駕性能即高速飛馳，掟彎時有紋有路，後者過彎時膝部開始貼地。在旁的陳耀麟說：「咪睇迷你車細細架，當你坐上去便會感受到速度感其實好強，但咁耐冇玩，初時要啲時間適應。你睇！佢哋熱咗身後，開始掟彎，而掟起彎上嚟，非常刺激！」
帶齊裝備落場保安全
利偉倫笑說：「MiniBike最吸引是速度感，今次走咗兩個圈開始唔想停，但初學時如想掟彎姿勢靚，難免會炒車，所以必須要戴晒頭盔、手套及護膝等先好落場。」
特稿：山度士帶起熱潮
本地甲組球圈近年除掀起wargame熱外，原來在晨曦助教山度士（小圖）大力推薦下，MiniBike也一度起熱潮，還令不少本地球員斥資買車，方便「飛車」。
據晨曦中場羅志焜表示，MiniBike熱大約在年多前在球圈掀起，最多試過有超過10名甲組球員相約到天水圍玩車：「我記得山度士經朋友介紹玩過迷你電單車後，便叫球員入去試玩，大家玩過都覺得好玩，便越來越多球員加入。」
球員花2,000元買車
「𡃁焜」：「玩得最投入嘅時候，有十多個球員花了2,000元買車，每星期入去玩兩次，每次玩成幾個鐘，都不知幾熱鬧。」
不過，這股熱潮不久便減退，據聞有幾個原因，首先迷你電單車其經常要維修，加上天熱時，帶齊裝備未落場已經大汗淋漓，故部份球員玩了一段時間便將戰車轉手，若壞車便棄置在廢車場，只有小部份仍留着座駕。本報記者
知多啲MiniBike
Q：一部MiniBike貴唔貴？
A：由＄1,800至＄2,500不等，有國產及歐洲車；連戰衣、手套、頭盔等裝備，約＄3,000便可買齊全套。
Q：操控會否很困難？
A：車身細小，但不太難控制；懂踩單車都懂開迷你電單車，女士及小朋友都無問題。由於要經常屈着坐，最初腳腕可能會比較累及不習慣。
Q：MiniBike能否在公路上行駛？
A：市民只可在MiniBike專用場地駕駛。
Q：一部MiniBike有幾重？有幾快？
A：約重20公斤，時速一般約為30公里（視乎引擎容量），最快可以高達50公里。
Q：用甚麼燃料推動？
A：電油。耗油量低，約30元油便可玩3小時。
邊度有得玩
有叉用燒烤樂園
地址：元朗天水圍天慈路馮家圍30號
推廣優惠價：$420
查詢電話：24748333
網頁： http://y1.hk/x/index.htm