【本報訊】中年失婚婦懷疑遇上愛情騙子，與一名在深圳工作的澳洲男子共賦同居大半年，指遭對方騙去30萬元。婦人早前提出分手後疑遭人「調虎離山」，潛入本港住所偷去約14萬元財物後不知所終，她已報警求助。 記者：周鴻熙
報稱被騙財騙色失婚女子姓余，自稱Mary現年50歲，子女長大成人。曾從事時裝生意、家住元朗區的余表示，去年4月在尖沙嘴購物時，一名懂普通話在深圳工作的36歲澳洲男子Reilly，與內地女朋友向她搭訕，雙方交換聯絡電話。
「一個月後Reilly打電話畀我，話同女友分手又話對我一見鍾情，多次見面後我俾佢嘅甜言蜜語打動，好快同佢喺深圳租屋同居。佢答應今年4月同我結婚，亦嚟過我元朗屋企㖭！」Mary指兩人在深圳生活費全由她支付，其間男方先後向她借了共30萬元人民幣。「我覺得佢不斷向我要錢有問題，佢啲同事講佢以前喺杭州工作好花心，我曾經提出分手要求佢還錢，每次佢都認錯同𠱁番我！」
本年3月，她向Reilly重提4月結婚一事，對方卻表示冇結婚打算，「我當時好傷心，提出分手要佢畀番30萬我，佢最後簽咗一張15萬元欠單，話4月開始分期還錢但係咁拖，大家仍一齊住拖拖拉拉咁！」Mary指上月28日，男友要求她回港代為購買日用品，原來一切有預謀。
帶走個人資料失蹤
「我買完嘢返深圳等唔到佢Call我，返到屋企發覺佢帶走晒所有私人物品同資料。」Mary無奈返回元朗住所亦發現被搜掠，失去金錶、名貴手飾同現金總值逾14萬港元。
「我懷疑佢偷偷配咗我屋企門匙，喺嗰日『調虎離山』，趁我喺香港佢就搬晒深圳屋企啲嘢，我返到深圳佢就嚟香港偷元朗屋企啲嘢。」
Mary懷疑遇上愛情騙子，前日到警署報警。