楊千女華去年10月舉行個唱，為了保持最佳狀態，她在個唱前三個月已開始請專人教她做運動打Boxing及控制飲食，每星期還會抽時間去推淋巴，結果短短一個月，她減了超過10磅，面部水腫的情況也得到明顯改善，所以開完個唱後，千女華仍繼續做運動喼弗。
撰文：陳月媚
在演藝界工作的人，大部份是貓頭鷹，偏向夜睡晏起，以前楊千嬅也是貓頭鷹一族，但自從愛上做運動及打Boxing後，整個生活習慣都改變了，日前她接受本報記者專訪時說：「做呢行壓力好大，個人好容易失眠瞓唔着，搞到差唔多天光先瞓，生活好唔正常，皮膚差之外，身體仲出現水腫，又容易病，呢段時間成日要睇醫生。」
朝朝做運動兩小時
去年初千嬅體重最高峯達130磅，如今就維持112磅，她對現時的體重很滿意，她說：「上年我咁有決心減肥，係因為經過一輪喪食後，有日我上磅，體重竟然達到130磅，我自己都嚇呆咗，一定唔可以再畀自己肥落去，如果唔係仲使嫁人嘅！
「跟咗教練Anson做運動後，情況有好大改變，因為我每朝10點就會到健身中心做運動，最少做兩個鐘頭先會離開。每次做完運動出咗一身汗後，個人都特別精神。」
早睡早起體重降咗
因為每朝要早起床，所以千嬅每晚12時許就會上床睡覺，她表示：「唔知係咪因為朝早做過一輪運動，12點上床瞓都唔會覺得太早，而且瞓得好好，𠵱家我啲生活真係好健康同正常，不但體重降咗，身子都冇以前咁差！仲有機會參加埋賽跑，生活過得相當充實。Nike最近同我講，話有個世界性嘅賽跑活動，所有參賽者同一時間喺唔同國家齊齊起跑，睇吓到時邊個可以勝出，Nike問我有冇興趣參加，地點可以畀我自己選擇，我覺得都幾新鮮，到時我會選一個未去過嘅國家做起點，我打算參加跑半馬嘅賽事。」
戒吃煎炸油膩食物
千嬅最近看了很多有關健康的書籍，明白到要保持身體健康，每日最好抽少許時間做運動，所以怎樣忙碌也好，她都會趁空檔做伸展運動，她說：「如果真係忙到唔可以上健身中心做運動，咁咪臨瞓前做吓拉筋同伸展囉！有時夜晚先得閒，我會叫教練陪我去跑馬地馬場跑圈。
「教練話我𠵱家每日所做嘅運動量已經足夠，飲食方面能照足佢畀我嘅餐單，咁就會相得益彰。教練嘅餐單主要係叫我唔好食煎炸同油膩食物，酒同咖啡呢類飲品都叫我盡量唔好掂，呢排我真係好聽話，所以都減咗磅。」
撚手小菜：薑葱炒蟹𠱁爸媽
現代女性因為專注在事業發展，入廚機會相對減少，但千嬅在母親的影響下，偶爾都會在家下廚弄幾味小菜與父母分享。她的招牌菜是薑葱炒蟹、帶子炒西蘭花及清炒蝦仁，最撚手是煲滋潤老火湯，楊媽媽吃過也讚有水準，不過父親認為她煲的老火湯略嫌偏鹹。
「要夠力去炒」
每次煮薑葱炒蟹這味菜，千嬅會叫母親到街市選購新鮮靚蟹，她說：「炒呢個菜一定要夠火候，揸鑊鏟炒蟹時一定要夠力去炒，只要啲蟹夠新鮮，炒出嚟嘅蟹一定會好鮮味。至於煲老火湯，我最擅長煲螺片、蘋果、紅蘿蔔加粟米嘅老火湯，我呢個湯畀過好多朋友飲，佢哋都讚口不絕，但爹哋就話個湯煲得鹹咗啲，叫我注意落鹽份量，所以我𠵱家煲呢個湯盡量唔落鹽嘞！」
千嬅喼弗餐單
早餐
一碗燕麥片、脫脂奶或兩隻炒蛋（不要蛋黃）或兩塊麥包多士
午餐
六件壽司（不放醬油）或10條細胡蘿蔔或茄汁意粉加兩塊去皮雞
晚餐
一條蒸魚或一碗雜菜或九安士燒三文魚
＊這菜單是教練專門為楊千嬅而設，並非人人適用。
心水食肆：最愛日本上海菜
千嬅鍾情日本及上海菜，以下三間食店是她的心水選擇。
放肆嘆魚生--花盃日本料理
「呢度嘅海膽壽司好鮮味，魚生好新鮮，吞拿魚腩係冇筋部份，口感唔錯，呢度嘅鐵板燒水準都唔錯，聽我啲朋友講，呢度嘅鐵板燒和牛好正，但我因為唔食牛肉，所以就冇品嚐過，不過鐵板燒海鮮餐，包括帶子、大蝦同銀鱈魚都好食，偶然嚟呢間店放肆食番餐都唔錯嘅。」
老上海風味--上海總會
「食過咁多間上海菜館，我覺得呢間最合我口味，不過上海菜太油膩，我都唔幫襯得咁密，呢度嘅熏蛋、素菜餃、小籠包我都好鍾意食；主菜方面，清炒蝦仁、火丁甜豆同皇朝翅都係我嘅心水選擇，特別係皇朝翅個雞湯，真係好好味道。不過呢度只招待會員，普通市民未必可以試到一班老上海師傅嘅廚藝。」
燒餅要少油--海都酒樓
「呢度嘅菜式雖然變化唔大，但勝在保持水準，而且侍應生嘅服務態度好好。呢間食店嘅黃橋燒餅、蝦醬生菜煲、魚湯米線、蟹粉小籠包同干扁四季豆都係我嘅心水選擇，甜品如千層糕我都好鍾意食，不過每次嚟到呢間食店叫菜，我會吩咐廚師盡量落少啲油，咁樣會食得健康啲！」
學打Boxing擴闊戲路
楊千嬅雖然一向都是以拍喜劇為主，去年她與張國立合演內地劇《武十郎》，她飾演武學世家的女兒，武功非常了得，看過該劇的觀眾都會詫異，原來千嬅的身手不錯。
拳腳夠狠
自從這齣電視劇後，千嬅已開拓動作戲路，所以去年開始學打Boxing。記者見她與教練對打時，打得有板有眼，起腳出拳都好狠，想不到她打拳時也是辣妹一名。
教練指千嬅進步很快，雖然她沒有功夫底子，但她打Boxing出拳有力，實有學功夫的潛質。千嬅表示：「我學打拳最大原因係為強身，第二個原因就係為將來拍戲用，𠵱家我主力走喜劇路線，但我覺得只係走一條戲路太狹窄，所以自己諗得好清楚，應該開闊戲路。上年我拍過《武十郎》呢齣劇，先知原來自己都可以拍打戲，咁咪試多一瓣囉！」
採訪手記：羨慕大隻洋妞舉沙包
在健身中心做運動時，千嬅雖然只是應本報邀請來拍照，但她面對各種健身器材時，躍躍欲試，在跑步機跑了約15分鐘後，已見她滿頭大汗，當她見到有一名洋女很健碩，可舉起沉重的沙包，千嬅不禁「嘩」一聲讚嘆，並笑言自己未能舉得起它。
沙律記住走醬
做完運動後，千嬅洗過澡後便到四季酒店咖啡廳接受訪問兼吃午餐，見她點了走醬沙律和一杯果汁，吃得很清淡，問她沒肉到肚會否感到肚餓？她說：「初期係覺得幾唔習慣，但𠵱家已經適應到，完全唔會覺得有問題，𠵱家我好少食紅肉，就算食白肉都盡量唔放油。」為了有健康和苗條身材，真是要付出很大代價！