唔跑回北京一轉，真係冇留意Nike原來叫「耐克」。兩日一夜的連環北京晒冷，所學的何止「耐克」這兩個字咁簡單。一個歷史展覽、一個紫禁城表演、一晚派對新貨預覽，已教我腦袋記憶體逼爆。深深體會的，Nike重視中國的程度已超乎我想像。全力一谷，教雙方都走進雙贏的局面，亦如其主題一樣「百戰百勝」。
記者：許維維
攝影：陳陶陶
Nike正式分家
摷出腦袋記憶體翻查過，儲存最多資料的就係NSW新貨。搶先睇又有得買喎，係咪無可厚非先！昅實心水貨當然係主因，有驚喜、有新鮮感係最大輔助力。NSW（NikeSportwear）於1979年初次定名及推出，但那件叫Nike，那件叫NSW，一向含糊。由08年8月8日起，產品會清楚分為兩大派，所有潮流服飾都統一稱為NSW，開始正式分家。以奧運作主題的NSW最新系列，感覺的確煥然一新。半透明全白色的InLineMedalStandWindrunner、兩條拉鏈令風褸可以一分為二的國旗Windrunner，令幾年冇買過風褸的我都鎖定了這兩件入貨目標。連Wyman都讚其半透明設計：「終於可以唔使嘥咗入面件衫。」最煩係同完兩個Nike設計師傾偈，又發覺他們推介的Flywire系列非買不可，以極幼鋼絲組成的圖案設計，真係好鬼有型靚仔。我開始感到8月將會成為我重創的大日子。
（所有NSW新貨售價待定，預定7月起開始發售。）
全白色InLineMedalStandWindrunner。半透明的UltraSuperlightweightJapaneseNylon，係最新研製的最輕及最薄物料，一望就知可以打掉舊有風褸的呆板，締造全新新鮮感。
技術唔係得個講字
運動用品功能點勁，一向聽完就算，只覺都係噱頭。晒冷第一站就拉隊去798藝術區，盡Show一百件經典運動用品背後的故事，名為「百戰百勝」。好多嘢唔講真係唔知，由一支原子筆承托波鞋、鞋底窩釘因為食格仔餅聯想等，其實都幾有趣的一件事。沿路四圍都係爛路地盤、棄置工廠，搞到Nike全棟重新包裝的建築物特別搶眼。一間潮流博物館，可以力證咁多年來的努力，又可以借為奧運打氣宣傳。雖然我怕悶怕歷史，但呢一着品牌包裝，他們又成功了。
囗Nike706空間，全棟大廈牆身以百葉簾式轉換多張大相，幾搶眼！
囗展示多年珍藏，逐一解構當年的設計理念。
囗100件展品存放在玻璃箱內，逐件慢慢咀嚼背後的歷史，起碼用上2個鐘頭以上。所以我放棄。
囗為減輕鞋身，BillBowrerman於60年代就諗出最輕的物料必定係速遞的信封袋，將其原理運用於波鞋之上。
Nike706空間
地址：北京市朝陽酒仙橋路4號798藝術區
開放時間：即日起至8月31日（上午10時至晚上6時）
費用：免費入場
紫禁城ShowTime
舊年一個長城FENDI時裝秀，已經印象難忘。今日來個紫禁城太廟大晒冷，震撼力雖不可比，但有發紅光的太廟作背景，一樣夠晒氣勢，令入場人士嘩然。我好奇的係，中國究竟仲有咩地方唔借得？中國有28隊奧運隊，Nike今屆一口氣取得22隊服裝設計權。由30年前打入中國市場開始，今次咁大型的Showoff表演，足證Nike對中國的越趨重視，亦可收強勁的宣傳之效。相對，中國既可為奧運隊打造全新形象，亦可以借Nike為奧運作世界性宣傳。所以貨品有冇得買都已經唔係重點，今次ShowTime都足夠為大家締造出雙贏局面。
同樣公認係一級Fans的Wyman：「中國逐漸懂得揀啱合適嘅合作夥伴，今次呢批運動員衫唔算叫好突出。但運動衫而言，已經十分合格。遷就功能性同時，可以加到少少時裝元素已經夠驚喜。最搶眼係田徑手嘅長手襪、同泳手嘅連身衣。」
藤原浩儼如遊客般，拿着相機不停拍照。冒昧要求拍照訪問，表現親民不拒。「第一次嚟到北京，個Show喺咁古色古香嘅太廟度舉行，感覺好震撼。無論環境同啲鞋都好靚，我好鍾意。」
