有機構投資者減持建設銀行（939）4.08億股，傳聞指係中國人壽（2628）沽貨。
國壽於05年10月建行H股公開發售時認購了4.09億股，兩筆股份數目相若，如果真係國壽減持，照咁推斷，已等同盡沽手上所持建行矣！
續有併購活動
今次建行被沽，可謂給予散戶們一個提示，就係中資銀行股禁售期漸將屆滿。年內經濟情勢難睇，個別策略股東有貨在手，見價啱又等錢使，點會同你客氣？不過，有人沽貨，市場上亦會有相等級數之士接貨，否則點食得晒？
今年市場整體氣氛令股票唔易炒，過份高追中資銀行股隨時要「坐艇」一陣才有回報，反而趁調整收集穩守突擊，則不失為較佳策略。
利和經銷（2387）近期連番有收購，包括收購環球製藥，以及洛杉磯一間第三方物流公司WTI；集團表示將續有併購，以配合業務發展。利和去年純利增長21%至2815萬美元，惟股價跑輸大市大半年，過份低殘，昨日收報20元，微升0.10元，不妨收集持中線，目標28元。