日本著名體育報章《日刊體育》近日頭條報道，指千葉市原有意羅致英格蘭國腳兼紐卡素前鋒奧雲；此宗報道絕非煲水新聞，因為已得到市原總經理證實，仲話呢宗交易已醞釀多時。
不過，千葉市原想簽奧雲相當困難，尤其係要面對財政上嘅問題，根據英國《每日郵報》報道，曼聯早前出價1,500萬美元（約1.2億港元）收購奧雲被拒，而奧雲父親曾效力嘅愛華頓，亦對奧雲虎視眈眈，市原要打敗其他球會，必須出更多錢；但市原出名係日聯最窮球會，2006年全年收入僅2,800萬美元（約2.2億港元），試問又點負擔得起奧雲嘅轉會費？
計番條數，自從市原季初賣走水野晃樹、羽生直剛、山岸智、水本裕貴及佐藤勇人5名國腳後，賺到大約1,000萬美元（約7,800萬港元）。正所謂有錢使得鬼推磨，市原得到呢筆可觀收入，確實有條件羅致奧雲呢類重量級球星。
有錢花應買靚土炮
不過，問題係市原真係需要奧雲嗎？當然，好似奧雲呢類級數嘅前鋒，每支球隊都想擁有，但奧雲身價起碼值2,000萬美元（約1.6億港元），如果市原有咁多錢，不如收購多幾名好球員，因為喺日本，2,000萬美元已經搵到5至6個好球員加盟，幫市原護級。
我個人嚟講就唔太鍾意過氣球星，好似當年名古屋八鯨嘅連尼加、鹿島鹿角嘅白必圖及FC東京嘅雲祖柏等，嚟到日本都冇乜貨賣，而史杜哲高夫、米高勞特立及艾蒙度，甚至與球會不歡而散，製造好多麻煩。
千葉市原目標係護級，如果行錯下一步棋，隨時萬劫不復，忘記奧雲吧！更加唔使諗碧咸、C朗及朗尼……