好多老友都知道編輯Y會離開報界，出任鄭汝樺副手，當上運輸及房屋局副局長，但係老友人人畀面，恐怕呢啲事情會見光死，所以冇人在報紙提起，以免連累編輯Y冇咗份好工。好嘞，𠵱家《星島日報》（五月十三日）大字標題，出埋相㖭：透露誰是副局長，編輯Y榜上有名，咁就唔怕講佢啦。
編輯Y就係現時《經濟日報》執行總編輯邱誠武，一九八二年畢業於中大聯合書院生物化學系，讀書時係學生會活躍分子，現任聯合書院院長馮國培教授係佢老師；佢讀完生化系就走咗去做記者跟邵善波辦雜誌，份雜誌執笠後就走咗去英文《虎報》，後來去咗英國讀法律，但回港後唔願做律師，加入《經濟日報》。有此歷練背景，邱武嘅中英文寫作能力都冇問題，他日做副局長埋頭苦讀堆積如山嘅文件或者為老闆寫台詞，應該應付自如，至於識唔識得運輸政策（例如機管局是否要興建新跑道，十號貨櫃碼頭有無需要）或者房屋，係次要問題啫，鄭汝樺以前都未做過啦。
老友做副局長，左丁山與有榮焉，唔會評論佢住，直至佢表演三個月之後先至開聲，夠禮貌喇啩。邱武毅然轉行，任重道遠㗎，如果佢嘅表現唔好，以後我哋啲傳媒朋友會少咗一條新路行。至於記者轉為官員，他日唔做，又返回媒體，是否有問題呢？左丁山就認為冇，喺一個開放社會，人人有轉工自由，只要轉工轉行之人知道清楚自己嘅角色與責任，唔好混淆兼混水摸魚就得嘞。譬如呢排睇FoxNews，成日見到喬治布殊總統嘅前親信/競選經理/白宮前辦公室主任羅夫（KarlRove）以政治分析師身份出現，評論奧巴馬與希拉莉，成個資深傳媒人咁款，但佢去年中離開白宮之前，美國記者想搵羅夫做訪問，都唔知幾困難。邱武做完四年副局長返回媒體做總編輯嘅話，話都冇咁易，又或者有新特首睇起做局長或者劉兆佳教授個位一樣得，替代何安達做特首辦新聞統籌專員，更加駕輕就熟。恭喜晒，爭氣啲呀邱武。