捐款賑災，如風起雲湧，李嘉誠基金會率先捐三千萬元，馬會捐三千萬元，跟住邵逸夫爵士捐一億，其他捐一千萬五百萬，三百萬元者不勝枚舉。我哋當然冇資格學人捐咁多，但由十蚊至一千蚊，好多人都捐得起啫，有意思捐錢啫，唔使諗咁多，可以直情行入匯豐、恒生、中銀、東亞等銀行分行，開口話要捐錢畀紅十字會、樂施會、宣明會、救世軍等等慈善機構，相信銀行職員會好樂意協助。中大校長劉遵義就發公開信畀中大人，呼籲捐款。中大校友會聯會正在跟進。
上星期三早上十時許，公民黨吳靄儀、梁家傑、湯家驊、張超雄等四位議員在中環華人行門口喊捐，到咗中午十二時後，民主黨楊森議員在馬莎門外呼籲捐錢，晚上六點幾，又到自由黨人在雲咸街/大道中相交界呼喊勸捐，市民捐錢情況相當踴躍，無論捐十元還是一億，無足掛齒，總是一番心意。
四川災區據稱停電缺糧冇水，基本生活艱難，香港啲記者唔理會艱難情況，勇闖山區為我哋帶來最新消息，其專業及拼搏精神令人佩服不已。佢哋報道得多，顯示中國愈開放，為中國締造一個好好嘅國際形象。只不過《金融時報》（五月十七日）引述《人民日報》披露，中央宣傳沙皇李長春已下指令，內地傳媒報道地震災難，必須強調團結穩定，發放正面訊息，緊跟中央宣傳路線。用香港術語，即係只准報喜不准報憂，但挖掘負面新聞係西方記者天性，香港記者亦受西式訓練所影響，入到災區之後，就記錄番豆腐渣學校工程，地方搶救不力，糧水短缺等「負面」消息，左丁山心為之危，香港記者再係咁尊重災場真實感，容乜易畀中宣部送返香港㗎！
全國救災，最頻撲者似乎係溫總理一人，在四川來回往返，曾摔到流血，更哭得不成樣子（內地記者語）現在已經面容疲乏，聲音沙啞。唉吔，中國咁多地方大員，部長委員長等等，究竟全部去晒邊？唔通冇咗溫總理在現場，災民就會被遺忘？大國崛起，少不了一套完善救急體制呀！