台灣跳舞天后蕭亞軒（Elva）重投台灣EMI旗下，下個月仲會推出新碟《三面夏娃》，佢最近秘密拜內地武打小生吳京為師，學習過招、踢腿等招式，每日苦練功夫7個鐘，目的係想喺新歌《Moremoremore》化身成「武后」，實行同「舞孃」蔡依林（Jolin）一較高下！
基本功練起
日前Elva喺香港跟吳京練武，雖然佢想學識少少功夫，方便以後吊威吔，喺MV裏面呈現出有型嘅武打動作，但都要由出拳、踢腿等基本功開始練起，而且練得算勤力。
師傅唔鬧人
吳京俾人話係個「不罵人的嚴師」，即使你做得唔好，佢都只會講：「很好、再來吧。」然後要你一而再、再而三重複動作做到佢要求為止，例如吳京嫌Elva出拳唔夠力，就要Elva不停練習，雖然揮拳揮咗超過一千次，但Elva哼都冇哼一聲，再攰都照做頂硬上，係就係好辛苦，但Elva話跟吳京學武學得好開心。問到會唔會搵師傅做MV男主角，Elva公司就話要保守秘密，暫時唔講住喎！
