伯南克呢幾日頻頻演講，好驚佢又有啲驚人之語，前晚佢就提醒啲banker，叫佢哋要積極啲搵人入股，班多啲水等資本雄厚啲，咁即係話啲bank仲未掂，花旗股市俾人質一輪無可避免，不過，入市嘅動力強番，花旗股市最後都係高收，而且走勢仲幾靚㖭。
好多人唔明老伯點解叫銀行搵多啲錢壯大股本，其實都係架CAR累事，呢架CAR唔係老伯同banker嘅座駕，而係CapitalAdequacyRatio（資本充足比率）嘅簡稱。
如果大家有留意，早排已經有間bank嘅CAR跌到7.5巴仙，即係話低過8巴仙嘅要求，喺咁嘅情況之下，banker只有兩個選擇，一就係增大資本，一係就削減資產，即係做少啲生意，咁大家𠵱家應該明白點解花旗集團話要喺未來兩三年出售4000億美元資產啦！之前班咗咁多水仲未掂，仲有邊個肯落叠，唔減資產仲可以點？不過咁落去當地銀行業嘅前景就noeyesee，所以老伯就叫班banker諗吓計嘞。
中煤C輪4835：中煤（1898）昨收17.18元，短線有機會挑戰18元，破位就睇20元，可以諗吓隻C輪4835。隻輪昨收20.8仙，槓桿率8.3倍（有效4.3倍），正股見20元，4835應該喺38仙樓上，有超過8成升幅，如果正股跌穿16.30元，就沽隻輪止蝕。