今年車壇最矚目嘅事，肯定係德國Volkswagen喺香港同澳門嘅代理權，由今年8月開始轉到廠方手上。雖然尚未正式接手，但佢哋已密鑼緊鼓開新Showroom、維修中心、展開大型廣告宣傳等等；日前，廠方高層更特別來港會見傳媒，順道講吓未來發展大計。
新Showroom大四倍
席間，貴為VolkswagenGroupChina董事兼市場及銷售執行副總裁嘅蘇偉銘先生，指佢哋喺接手港澳兩地代理權後，誓要打倒對手成為車市一哥！「我哋會喺接手代理權18個月內，引入多7款全新型號。另外，我哋亦已喺灣仔設立一個三層高、比現有大至少四倍嘅新Showroom，同時仲裝有輕觸式互動裝置嘅外牆，以至係電子投射銷售支援系統等等，務求令車迷可以有一份全新嘅買車感覺，我哋亦正計劃喺九龍多開一個陳列室，以方便車迷。」此外，佢哋又會喺荃灣設立全新維修中心，希望可藉此為用家帶嚟更好嘅售後服務。照咁睇嚟，來年Volkswagen唔只經典跑車Scirocco嘅新生代有機會嚟到香港之外，而且仲肯定會有一番作為！
記者：鄭達基