郭可盈與夫婿林文龍由拍拖到結婚共處了13年，近日卻傳出四年婚姻亮起紅燈，她前晚亮相《蘋果》網站直播節目《娛樂開CHAT》，與主持人懷鈺分享夫妻相處之道，可盈說：「相敬如賓，呢句說話好老土，但係真嘅！」一直以來，可盈都讓人有「食住」文龍的感覺，她坦承曾經責罵對方，並說：「我唔會刻意中傷佢，但衝口而出嘅說話多的是，所以咁多年佢冇走係奇迹，有時越愛一個人，受靶越多。」可盈指文龍不愛嗌交，她說：「佢鍾意息事寧人，同男性朋友講開，佢哋都鍾意匿入山窿，思考一吓，往往呢個時間就係女仔最上火，可能就係男女之別。」大家可登入《蘋果》網站 http://ent.appledaily.com重溫節目。採訪：葉雪 攝影：陳俊強
郭可盈髮型：RickyKwok（LeSalon） 郭可盈化妝：鍾仔
懷鈺髮型：MattChiu（XENTERJUT）
拍劇盼再會嘉良 Agnes&Rachel
Agnes：我想問吓可盈，有乜嘢角色係未演過又好想演㗎？
郭可盈：我想演一啲傷殘，又會好發憤、教人點樣可以克服到呢種缺陷嘅角色囉，未必一定係傷殘，又或有任何缺陷，要經過一番努力而有成績嗰啲啦。我係等緊一個有意義啲嘅劇本囉。
Agnes：如果有得揀，你會想同邊個合作呀？
郭可盈：電影方面就一定係劉德華，因為真係好鍾意，由細睇到大，電視劇呢，家良（羅家良）好耐冇合作過喇，Bobby（歐陽震華）就搞笑啲，家良由《創世紀》之後都冇合作。你哋呢？鍾意我同邊個男artistes合作？
Agnes&Rachel：都係陶大宇囉，因為太深入民心喇。
清爽短髮賀跳槽 屯門阿寶
阿寶：之前啲頭髮咁長，點解咁捨得剪短呢？
郭可盈：我話轉咗新公司呢，想fresh啲，公司名Style，所以想有Style啲囉。咁多年都係長頭髮啦，咁又有一個大啲嘅轉變，夏天又好清爽囉。你鍾唔鍾意吖？
阿寶：鍾意呀！
郭可盈：個髮型師都好驚訝，佢一剪就係𠵱家呢個長度，地下就係嗰一呎長嘅頭髮，當時嘅公司人員仲話未見過有女artistes一下子剪咁長頭髮，出到嚟個反應好好。
男朋友仔約食飯 Lawrence
郭可盈：嘩！佢係我嘅男朋友仔嚟㗎，我哋之前拍《酒店風雲》佢做我個仔，有一日佢話畀佢媽咪聽，好想我做佢女朋友，之後又走去文龍度話我係佢女朋友喎，所以我就視佢係我嘅男朋友仔呀。
Lawrence：係呀，我想問你近期有冇拍嘢呀？
郭可盈：你呢？
Lawrence：有呀，未開，《烈火雄心III》呀。我好掛住你呀！今晚一齊食飯啦，我訂咗枱喇。
郭可盈：嘩！開始約女仔喇。記住呀，唔好掛住拍劇，要畀心機讀書，知唔知？
Lawrence：知道。
版主：凌零發
