四川地震讓很多災民身陷水深火熱之中，香港人向來樂善好施，今次也不例外，為賑災出錢出力，不少藝人都表示看到電視上的災場報道感到難過，且紛紛捐錢救助。
譚詠麟：睇新聞忍唔住喊
「我本來要去成都開騷，因為批文要延期至5月10日，我又怕唔夠時間，就想再延遲多兩日，諗住12號左右。最後因為做批文趕唔切，大家就提議不如等奧運完咗先再搞，啱啱避過呢一次，好彩改咗期，咁就吉人天相，如果唔係分分鐘食到正。我睇新聞真係嚇呆，見到啲小孩葬身嘅相片都忍唔住喊，啲小學生好似蝦米咁…。」
蘇玉華：幸成都拍攝改期
「原定安排四川地震嗰日去成都拍嘢，但因為檔期問題，所以改到6月先去，但暫時仲未知可唔可以出發。」
歐陽震華：盼盡快清理現場
「我知道我老婆已經捐咗，都係出點心，我睇到新聞都忍住喊，幾秒之間失去晒親人，天災冇辦法，希望快啲清理現場。」
蒙嘉慧：賣電單車做善事
「我睇到新聞，內地𠵱家需要好多血，所以我都走咗去捐血，後來我知道香港啲血係去唔到內地，不過，我知道就算唔關事都要做，其實車行先後送咗兩架電單車畀我，我都賣咗，最近呢一架賣咗5位數字，借花敬佛，諗住捐出去畀宣明會或者樂施會。」
方力申：呼籲歌迷齊捐錢
「我已經捐咗五萬去紅十字會，遲啲見到歌迷都會呼籲佢哋捐錢。無人會預測到天災嘅發生，相信傷亡數字會不斷上升，被埋或者失蹤嘅人仍然有，覺得好可怕，真係要有錢出錢，有力出力。今晚我就會幫手錄籌款歌曲，星期六去無綫嘅賑災騷。」
佘詩曼：內地兩助手無恙
「捐幾多唔好講，呢個係講個心意，我喺內地時有兩個助手，一個四川，一個重慶，我有打畀佢哋，不過搵唔到，跟住我打畀陳浩民，原來有一個喺佢身邊，另一個都冇事。」
