關詠荷自從停拍無綫處境劇後，即與丈夫張家輝和寶貝女盡情享受天倫樂，前日家輝一家三口趁空暇到中環逛超市，夫婦分頭忙碌，輪流招呼扭抱的B女，關詠荷連揀蜜瓜也要抱實囡囡，踢拖的家輝更一腳踢，負責推車仔狂掃700元的急凍食品，做人老竇確不易。
張家輝向來對妻女十分疼錫，為遷就兩歲多的囡囡Brittany上學，一家三口早於四個月前已遷離西貢，進駐價值2,300萬元的貝沙灣新居，張氏一家即由西貢友變成中環常客。前日家輝偕妻女齊到ifc商場的city'super超級市場入貨，惹來大批記者追訪，最搶鏡的B女遺傳了父母的演藝細胞，不時眼仔睩睩兩頭望，對鏡頭毫不抗拒。
身形漸豐
關詠荷兩月前停拍無綫處境劇《同事三分親》後一直養尊處優，與夫女樂享天倫，前日下午5時多，素顏及稍變豐腴的她身穿鬆身衫，與家輝和女兒齊逛超市，當時家輝踢拖、身穿恤衫及牛仔褲，蓄了齊蔭長髮的B女着花裙仔，cutie又活潑，但全程扭抱，要由父母輪流招呼。
其間關詠荷揀蜜瓜時，囡囡依然黐實媽咪抱抱，其後又要媽咪抱她看游水海鮮，家輝則負責推車仔掃貨，這位住家男人訓練有素，見他揀急凍食品時總細心留意標籤，當關詠荷抱到手軟時，家輝就單手推車，一手拖着愛女，只是不到三兩分鐘，Brittany又要扭計搵媽咪。
滿載而歸
張氏夫婦在超市各有各忙，最後揀了載滿一車的食品，包括急凍餃子、牛油、凍肉及雞尾酒等，埋單約700元。由於現場太多記者，超市職員見狀即驅趕，並優待家輝一家，安排他們從後門離開。
採訪、攝影：娛樂突發組