MPV王抵港　錫住皇帝女

MPV王抵港　錫住皇帝女

無得拗，ToyotaAlphard呢幾年只出一代，足以掃低所有豪華MPV，個個虎視眈眈等Upgrade第二代，未到5月尾大貨到港，代理已接400部定單，第一批車吸水二億！拎得五十幾萬出嚟，一眾名人明星當然識得欣賞，連唔曉肉赤嘅腌尖女友或囡囡，嘆過Alphard終極皇帝位後，一樣無詐型！

記者：徐影龍
攝影：譚盈傑
Model：Isha（StageModels）

■鬼面罩採用焗漆、鍍銀及同車身一樣色嘅三合一設計。

■三鑽明珠式HID頭燈具轉向功能，夜晚入彎更安全。

■泊車時，側鏡自動轉位幫你睇盲點。

中排最豪華

豪華唔係得把口講，新Alphard將第一代內櫳再度進化，獨立冷氣、劇院燈光等已屬指定動作，中排兩張皇帝座椅先係精髓所在；超闊落Ottoman座椅米色全真皮，摸落質感不俗，甫坐下已Feel到座椅弧位好貼屁股同脊骨，偏軟得嚟亦帶有承托力，校低張凳再挨埋個頭落三摺式頭枕，已經想瞓，但我對長腳屈起始終唔多舒服，索性校埋腳墊，仲有新加嘅踩板，成個人由頭到腳鬆晒，我同Model嘅睡意剎那間山洪爆發！坐車坐到好似搭飛機頭等艙咁爽，就算一班老細坐足兩日車上北京睇奧運都唔怕。

■椅背、腳墊全部電控調校，加埋新嘅前腳踏，似足頭等機艙咁舒服。

■中排兩張超級闊落嘅Ottoman皇帝椅，中間仲有枱仔畀你擺飲品。

■前後雙天窗，坐喺皇帝位睇燈飾都係一種享受，而雙電趟門具阻力偵測，唔怕夾到人。

劇院內裝　講究音場

坐得耐都會悶，好彩新車影音設備齊全，頂頭有個10"LCD，開套劉華演唱會DVD炸吓機都好噃。膚淺？OK，玩高貴劇院Feel一樣得，頂頭新加兩條隱藏式天花燈，柔和有氣派，襯埋喺美國專門研究音場嘅NXT系統及8個喇叭，聲音定位自然清晰，十足十坐喺皇室歌劇院度睇《孤星淚》咁好氣氛；此時此刻，就算開套《精裝追女仔》都無人敢話你膚淺！
車廂空間稍有變動，車長增加10mm，闊度增加25mm，內櫳叫闊咗少少，但最特別係車高降低45mm，成架車變成低重心設計，1.9米高不但出入停車場無咁易刮頂，而且行駛時會更穩定，坐嗰個都舒服啲。

■10"屏幕跟上代相若，不過NXT音場定位系統足以推高聽覺享受。

■上一代摺起尾排真係難搞到可以出汗，今勻改良到企喺車尾就可收起。

■新加兩條長長天花燈，現場睇好Grand好有氣氛。

■摺低三排座椅點瞓都得，若中排手枕能貼合就更Free。

+/-波畀老闆過癮

Alphard350名字由來，全因新版改用馬力更強嘅3.5V6引擎；第一代噸幾重行3.0只算夠用，來到第二代馬力增至274匹，開行冷氣、坐足七人兼上大斜路都一樣爆住去，而且波箱變成6前速，仲有埋+/-畀你玩轉數，大老闆坐到悶悶哋不妨同司機換位，親嘗呢台V6偈嘅勁度。驚嘥油？雙VVT-i令電油燃燒得更盡，減少浪費即係變相幫你慳油。
改用電軚咪以為只係更敏感，比油壓軚更優勝係具訊號輸出，新加嘅安全系統就係憑呢點去判定是否失控，再適量干預兩邊輪胎速度、加重Brake及制止軚盤不當轉向等，全個過程喺百分一秒內完成，保住條命仔就係靠呢一下！

■終於加入+/-波，玩6前速自然過癮得多。

■闊大擋風玻璃設計，能給予駕駛者廣闊視野範圍外，中控台屏幕更可在泊車時，讓你監察路面情況。

規格

引擎：3,456c.c.V6DOHC
馬力：274ps/6,200rpm
扭力：34.6kgm/4,700rpm
傳動：6前速半自動波
軸距：2,950mm
車輛提供：皇冠汽車（28661020）