四川大地震，好多小朋友頓成孤兒，國壽（2628）除咗向受災居民捐款，董事長楊超仲宣佈旗下嘅「國壽慈善基金會」會助養呢批孤兒到18歲。呢番善行，引嚟大批網友留言讚揚，喺《香港討論區》就有網友指國壽係良心企業，不愧為「忠國仁秀」，更話作為股東「坐艇」都抵。
網友arr讚：「國壽係一間為老百姓着想嘅公司，好高興可以成為其中一名股東，相比起另一隻大陸保險股平保（2318），只係捐500萬人仔，更為老百姓設想。」crickle話：「國壽咁通情達理，長線絕對係龍頭中龍頭。」edl0022就話好股有好報，「睇吓建行（939）同中行（3988），捐得快又捐得多，個市跌佢哋都係特別強啲。」可惜國壽大力賑濟，股價卻未能造好，噚日收32.85蚊，微跌0.6%。