英超玩完，今次早飛轉攻意甲。《奪寶奇兵》做到第4集，福伯魅力不減當年，邊個話老人家唔掂？AC米蘭奪唔奪到歐聯外圍賽席位呢個寶物，唔敢講，至少幾個老兵近況信得過，禮拜日煞科主場實同烏甸尼斯鬥攻，「大」硬。藍鑽石
AC上場無厘頭輸畀拿玻里，簡直係重創，將個「4哥」位讓番畀費倫天拿，煞科日既要贏烏甸尼斯，仲要望拖連奴幫幫手令費倫天拿失分，否則要同歐聯資格講拜拜。點都好，先決條件係自己贏波，睇恩沙基呢位老將最近狀態咁「弗」，配合卡卡、柏圖，冒進搶攻點會冇波入？
AC煞科好「大」膽
AC近3場主場贏晒，共轟入10球，睇上次主場對國際米蘭嘅上半場攻勢真係嚇死人，不過好衰唔衰尼斯達、加度素呢兩位防守悍將都停賽，後防想唔失波又有啲難度。
由於爭意盃嘅國際米蘭、羅馬肯定打到歐聯，令本來穩奪第7嘅烏甸尼斯都攞到下季歐協盃參賽權，但據報烏甸註冊參加歐洲賽方面好似出現問題，家陣仲未有定論。點都好，烏甸呢隊波不嬲無改錯名，係「癲」嘅，最鍾意搞搞震，而一對意大利國家隊孖寶廸拿達利、加利亞雷拉真係好勁，個人突破、遠射瓣瓣掂，如果唔係後防戰力麻麻哋（37場失49球，係前列失球最多嘅球隊），AC都未必贏得輕鬆。總之今場押「大」除笨有精。
翻往績，近年AC喺主場煞科成日開好激嘅「大」膽，上年就輸畀今場對手烏甸尼斯2:3，05年就和巴勒莫3:3，不過我就首選AC贏4:2，呢個係04年AC主場煞科，亦即係畢生偶像巴治奧告別戰嘅戰果，純粹直覺，好分又有機會開，不妨試試。
早飛王貼士
星期日22AC米蘭vs烏甸尼斯
首選︰AC米蘭大（1.52）
次選︰AC米蘭勝[-1]（1.8）
冷選︰AC米蘭勝4:2（40）
《周末早飛超級重心》
「森多」近況較祖記好
星期六13
森多利亞vs祖雲達斯1:1(7倍)
先睇戰意，祖記已經穩奪第3，手持歐聯外圍賽參賽資格，今場戰果係點亦無關痛癢。森多利亞今季主場只係輸過兩場咁大把；再睇近況，祖記近兩仗1和1負，而森多利亞近７場僅失8分，表現平穩。總之森軍近況較好，要喺有主將甘莫蘭尼斯停賽嘅祖記身上搶1分，無難度。
卡軍戰羅馬1分夠皮
星期日25
卡坦尼亞vs羅馬2:2(10.5倍)
羅馬近期甚勇猛，但諗深一層，自從隊長托廸因傷缺陣之後，羅馬喺失去球隊重心下表現下滑，加上球員仍有奪冠機會嘅情況下增添唔少壓力，今仗要作客贏卡坦尼亞冇想像中般容易。由前意大利鋼門辛格領軍嘅卡坦尼亞，今場只要取得1分即宣告護級成功，戰意唔比羅馬球員低。
拉素主場謝幕可秤先
星期日26
拉素vs拿玻里3:1(14倍)
兩軍同位於聯賽榜中游位置，既無降班威脅，又無機會爭歐洲賽資格。拿玻里上周主場輕取AC米蘭，賽後同一眾球迷大開派對，有如已經完成整個球季一樣，由此可估計拿玻里今場有機會大踢「風流波」。拉素球員始終要向一班支持者交代，主場謝幕戰不容失威。