國家統計局噚日公佈最新一季全國城鎮居民收入，上海居民收入繼續位列全國「冧巴溫」，今年首季人均收入達8412.89人仔，遠高於全國人均收入八成。不過，最令華華感興趣嘅係做開阿二嘅北京，今年阿二地位不保，俾浙江爬頭。
浙江居民人均收入8015.11人仔，比北京居民嘅7094.1人仔，多近千銀。點解北京居民收入跌咁多？專家講同股市有關，因為北京唔少民居都有炒股，今年大陸股市表現咁曳，咪拖累北京居民賺少咗囉！
其實，浙江有唔少富豪，香港人最熟識嘅就係有「上海和黃」之稱嘅復星國際（656）主席郭廣昌，據07年胡潤中國富豪榜，郭廣昌排第十，身家360億人仔。
內地飲料名牌娃哈哈集團嘅第二大股東宗慶后家族亦嚟自浙江，喺富豪榜排18，另外，喺香港上市嘅內房股綠城中國（3900）主席宋衛平亦係浙江人，富豪榜排第60位。咁多有錢人，難怪取代北京成阿二。