前排華華將四叔李兆基嘅「股神揀股名單」首季成績，同畢菲特旗下巴郡持有嘅股票比一比，結果由「香港股神」自貶為「冒牌股神」嘅四叔，首季成績麻麻。唔知係咪有見及此，所以佢啲手下同佢開個玩笑，整艘艇返嚟。
恒基地產（012）發展嘅大埔比華利山別墅，特別花咗兩千萬，喺意大利訂做咗艘遊艇返嚟，供業主同住客租用。聽幫手買艇嘅嘉滙遊艇董事總經理黃錦培講，艘艇57呎長，最高時速行33.5海里，內外都係度身訂做，配備最先進設備，好似個可以穩定船身，減低乘客暈浪機會嘅Anti-RollingGyro系統，太空船至用到，所以艘船價錢比一般意大利遊艇貴兩至三成。
供大埔比華利山住客租用
恒地營業部高級副總經理林達民話，屋苑住客隨時可以租嚟出海，可以選擇喺西貢匡湖居遊艇會或者屋苑附近碼頭上船，但無講到租金點計。另外，據華華所知，個屋苑冇私家碼頭，啲住客要行去附近避風塘嗰邊上船，喺度有唔少漁船停喺度，都幾有漁村風味㗎。
𠵱家啲香港豪宅提供埋出租遊艇嘅冇幾多個，薄扶林貝沙灣係其中之一，恒地咁落本，對住客嚟講當然高興，但對於跟四叔買股嘅散戶嚟講，就似贈㷫多啲。
電郵：mailto:[email protected]