郭富城噚日專程返香港宣傳由佢任代言人嘅手錶，佢獲廣告商厚待，送咗一隻首次曝光、約值10萬蚊嘅手錶畀佢之餘，仲畀佢喺店裏面搵隻同款嘅錶送畀媽咪。城城話：「我只係送過錶畀媽媽，佢係我生命中最重要嘅女人。」大會又搵咗着比堅尼嘅女模襯城城，未知城城係咪心繫緋聞女友熊黛林，竟然一眼都冇望過女模。
當老闆叫女模向城城獻吻，城城話：「Uptoyou（隨你）。」女模錫佢嘅時候仲不經意咁大送秋波。其後城城否認有食到「波餅」，問佢女模換咗熊黛林會唔會尷尬，城城話：「唔知呢？你哋等機會啦。」對於有傳言話佢送車畀熊黛林，佢話：「失實嘢唔回應，唔喺香港都咁多新聞，點答得晒。」
呼籲歌迷捐血
最近喺泰國拍緊電影《風雲2》嘅郭富城，被鄭伊健誤傷頭部，雖然已經痊癒，但始終動作場面多，令佢手臂多咗幾道疤痕，問有冇女仔讚佢有疤痕更加man，城城笑住話：「好man咩？唔覺喎。」另方面，佢都好關心四川大地震，佢話：「我每日都有留意事態發展，個心覺得好痛，我已經同經理人講咗，如果有乜嘢可以幫手，喺工作以外我都做。郭富城國際慈善基金𠵱家開緊會，睇吓可以捐到幾多錢，同埋歌迷會已發起捐款活動，我都呼籲歌迷捐血，𠵱家血係較困難啲。」