劉德華、關淑怡（Shirley）、張敬軒、陳柏宇、台灣組合蘇打綠及台灣新人王若琳，噚晚到將軍澳電視廣播城錄影《勁歌金曲》，開場時，首先由華仔帶領唱《中國人》，呼籲大家幫忙救助四川大地震嘅災民。
攬已婚監製
當晚Shirley先後換咗三套衫，包括有tubetop同埋露肩裙，錄影完之後，Shirley表現好風騷，攬住《勁歌》監製潘裕佳，記者立即上前影相，潘裕佳笑住咁話：「聽日又寫我哋乜嘢呀！」Shirley話：「好彩我識得佢老婆啫。」至於被彈冇禮貌嘅王若琳坐喺度唱《迷宮》嘅時候，竟然將其中一隻鞋用腳趾吊住fing嚟fing去，表現真係好冇禮貌，佢唱歌嘅時候更加係口震兼失準。
阿姨畀10萬
講到四川地震，張敬軒話會同屋企人一齊捐錢，佢哋合共會捐5位數字，另外有一位阿姨好有心，已經交咗10萬蚊現金畀軒仔，叫佢捐畀有關單位，軒仔話：「為安全起見，我要攬住嚿錢瞓先至得。」
張敬軒希望盡能力籌到20萬，佢話：「我仲會向身邊啲朋友埋手，即使係緋聞男、女朋友都走唔甩。」若果有善長要求軒仔同緋聞男、女朋友，包括關智斌（Kenny）同王菀之表演，唔知佢會唔會介意呢？軒仔話：「我自己就冇所謂，但係涉及其他公司我就唔敢揸主意嘞。」此外，軒仔已經同身在四川嘅大姨媽、四姨媽聯絡咗，佢哋都平安返到屋企。
