奧運火炬已傳到中國大陸境內，全程在公安完全掌控之下，必定再無問題。但火炬在境外產生嘅問題，仍有餘震噃，其一係美國「華僑」控告CNN，要求賠償十三億美元（每一名中國人賠一美元）一事，已不了了之，原訴人決定撤銷控告，律師行話：「受到多少壓力」，頗為耐人尋味。點解話告又唔告呢？喺美國打集體訴訟官司，稀鬆平常，原訴人究竟受到乜嘢壓力，壓力來自何方呀？五分鐘熱度，虎頭蛇尾，一時衝動，考慮不周，此乃唔少矇查愛國華僑之通病。
本欄曾講過一位西藏喇嘛到南加州大學演講，畀出席演講會嘅中國留學生羣起攻擊，其中一位更向喇嘛擲水瓶，畀保安員拖走。留美學生成為愛國憤青，本來唔係奇事，○八年五月號《開放雜誌》就有一篇「中國留學生為什麼如此瘋狂？」（八十四至八十六頁，作者曹長青）分析，有獨到之見。但係在南加州大學（USC）發生呢啲事，就係奇事嘞。一位南加州大學嘅高層最近訪港，據一位同高層見過面嘅人士引述高層說話，南加州大學最注重、尊重言論自由，任何人不得在校園內以任何手法干擾他人發表言論。嗰位擲水瓶學生，已被校友勸諭，請佢認錯兼道歉，但聽講留學生堅持愛國無罪，罵喇嘛有理，點都唔肯為干擾他人言論自由而道歉。南加州大學如果堅持行使校規，可以趕該學生出校，但係你知啦，USC係富貴子弟學校，校園內靚車滿佈，入得USC，學生家長唔會係平凡之輩，點做先至好呀！
曹長青話，中國學生自小在國內學習集體主義，對西方之個體主義甚為無知，雖然留學美國，但思想與美國學生格格不入，完全唔瞭解美國文化！講起個體主義（individualism），左丁山為之一震。已故小說家徐訏以東方既白之筆名，唔記得在邊一本雜誌，發表一篇長文講過個體主義，少年左丁山睇完又睇，從此受到啓發，尊重個體，厭惡一切假集體之名而行騙之政治口號。中國之有文革慘劇，皆因國人無個體主義意識也。