新屋入伙搞得七七八八，成班朋友已急不及待要來HouseWarming。既然係新屋，梗係樣樣都要有新意啦！一於搞個芝士Party，芝士做主角。當一眾人等以為芝士配紅酒就已經品味十足時，我就即時Show出另類配搭：果仁、蜜糖、仲有芥末。個個睇到目定口呆，食落口，簡直就係芝士味道新發現。
記者︰黃家欣
攝影︰梁細權、伍慶泉
模特兒︰QueenieLee
意式
配芥末 新奇有驚喜
為了這芝士派對夠出奇制勝，我早就四出訪尋意大利、法國傳統芝士食法。我每次買芝士必定會到跑馬地意大利雜貨小店ilBelPaese，老闆Massimo係正宗意大利人，但操一口流利廣東話。問佢意大利人有甚麼傳統芝士食法，佢竟然教我配芥末醬食，聽落已覺不可思議，完全想像唔到芥末同芝士都咁濃味，點可以溝埋嚟食。Massimo攞出幾樽類似果醬的芥末畀我試食。原來這裏可配搭芝士用的芥末醬有15種之多，燈籠椒、無花果、南瓜．．．．夠奇特！基本上我對初次接觸的食物都抱着大無畏精神，一於試！
Gorgonzola×無花果
Massimo說較Creamy的Gorgonzola配無花果芥末，效果突出。我勉為其難放入口，因為最怕藍芝士。口中芝士鹹香伴隨濃郁甜味，兩者味道竟出奇地夾，Gorgonzola亦沒有一般藍芝士的嗆喉。鹹甜相撞，味道好深刻。
Asiago×南瓜
南瓜芥末醬最有芥末本色，一聞已非常嗆鼻，食落口先來激辣，然後才是南瓜香。搽上味道似車打芝士的Asiago食，在濃重的鹹香下，減低芥末的嗆鼻，不過依然好激，食完後有南瓜的甜味留在口中。
Fontina×燈籠椒
芥末醬連燈籠椒塗在Fontina芝士上。芥末醬本身的味道已很複雜，甜與辣的味道均很濃，而Fontina的味道較淡帶點果味，所以入口已完全被芥末的甜味和辣味蓋過，吃完後才有淡淡的芝士迴香。
法式
配亁果 帶出果香
意大利芝士食法果然夠奔放，飲食講文化的法國人又如何呢？我再去向TheClassified的法國經理JB打聽。佢話︰「法國人食芝士好講Trend，之前興配紅酒，但今期已經轉用白酒襯，潮流轉得快好難追，都係跟自己口味最實際。我食芝士除咗酒、麵包、餅亁等基本配搭，仲鍾意配Nuts嚟食，好似烤杏仁、栗子等，一口果仁一口芝士，軟硬口感夾雜，令芝士味道更出。」
配蜂蜜 鹹甜有層次
Massimo推介的芝士食法中，我最愛這甜絲絲食法︰芝士蘸蜜糖。他說意大利人興甜食芝士，可用清甜有花香的Acacia蜜糖配托斯卡尼的羊奶芝士PecorinoToscanoD.O.P.。呢隻羊奶芝士一點羶味都無，味道清甜略帶點鹹味，加上蜜糖的甜，味道好有層次感，更有陣陣花香。
推介至愛芝味
囗牛芝士
芝士用雲南藏區的高原囗牛牛奶、以傳統阿爾卑斯製芝士的方法做成，是質感較實的半軟芝士，很有鹹香，奶味濃郁而羶味不重。加熱後還帶點藍芝士的幽香，試過用嚟做芝士蛋糕相當好食。
$45/100g（c）
PecorinoToscanoD.O.P.
意大利托斯卡尼的羊奶芝士，以放養郊外的綿羊奶製作，味道一點也不羶，帶點清甜，半軟的質地有點似巴馬臣芝士，點蜜糖食最一流。
$34/100g（d）
BriedeMeauz
最愛Creamy的芝士，好似Brie，一刀切下，芝士即從厚皮中傾瀉出來就至正！Brie源自十五世紀，本是貴族食品，皮上有一層白白的菌，都可以食。
$59/100g（b）
Comte
Comte是法國傳統硬芝士，製作時用上大量牛奶，成熟期需要半年到一年。據說路易十四亦最愛Comte。芝士入口先有濃郁奶香，伴隨Nuts的香氣。
$59/100g（b）
Mimolette
外形似南瓜，芝士皮超厚，製作時加入水果口味，成熟期要六星期至兩年。顏色好似中國年糕，入口很有果味，奶味濃郁帶甘甜，我最鍾意係佢煙韌的口感。
$78/100g（b）
售賣點
a.ilBelPaese（28682818）
地址︰跑馬地成和道23號
b.TheClassified（25253454）
地址︰上環荷李活道108號
c.天延食品（28650388）
地址：灣仔日街6號日新樓地下
d.City'super(23758222)
地址︰尖沙嘴海港城第三層