好多人都覺得SAV同Coupe係截然不同嘅車款，前者大大部可攀山涉水，後者則靈活跑得快；但德國BMW卻將兩者合二為一，並推出名為SAC嘅新車種，而X6更係首個型號。早前，我曾赴美國Greenville試駕新車，發覺佢唔只擁有X系列車款原來嘅強悍特性，全新4.4V8TwinTurbo引擎更帶嚟高達407匹馬力，完全切合廠方宣稱SAC既跑得又掟得嘅特質，即使喺盡濕嘅路面掟彎都定過抬油！
記者、攝影：鄭達基
線條凸顯SAC個性
仲記得去年德國法蘭克福車展，X6曾現身於BMW展館內；嗰刻只覺佢造型怪誕，車頭似SAV（SportsActivityVehicle），但車尾卻極似Coupe，望落硬係覺得怪怪哋，所以前赴美國Greenville參加新車發佈會前，對佢能否討好自己不敢抱太大期望……
坐咗接近一日飛機，終於嚟到位於美國SouthCarolina嘅Greenville，休息一晚後，翌日大清早就展開長達245公里嘅試車之旅。從工作人員手上接過車匙，步行往停車場領取當日嘅座駕；沿途已有唔少傳媒出發，故我便有機會從唔同嘅角度嚟欣賞呢款新車。正因如此，我便開始對X6嘅造型改觀，發覺廠方為佢刻意勾畫出嚟嘅「前SAV後Coupe」造型，其實係經過深思熟慮，從而達至令人一望而知佢係SAC（SportsActivityCoupe）嘅目的。
TwinTurbo引擎爆出大馬力
睇完X6嘅內外設計，都係時候出發前往另一主要試車場地LaurensProvingGrounds；由於用作測試嘅X6屬最Top嘅xDrive50i型號，所以配備咗全新4.4V8TwinTurbo引擎。呢台引擎嘅賣點係力大無窮，馬力輸出達407匹嘅同時，高達600Nm嘅扭力亦喺引擎處於1,750-4,500rpm時全數輸出，加上可作手動操作嘅6前速Steptronic半自動波箱，有助增強加速表現，實難怪新車0至100km/h加速只要5.4秒！
試車路程前半段大都係筆直嘅高速公路，此時只用D檔行車，發覺加速表現強勁，要逢車過車絕無難度；及後駛上迂迴山路，就將波箱改以手動操作，不但發覺陡斜嘅斜坡絕無影響佢嘅表現，一套xDrive四驅系統，都可以令我好安心咁喺山路掟嚟掟去。X6仲有一套名為DPC（DynamicPerformanceControl）嘅動態性能控制系統，佢可按情況調節四個車輪嘅動力分佈，即使係轉向不足還是過度轉向，當系統探測到有關情況出現，就會自行調節每個車輪嘅動力輸出，並按當時嘅軚盤轉向角度，以修正「航道」嚟保障乘客安全。
後排只能容兩人
正如先前所講，廠方為凸顯X6嘅SAC個性，刻意採用「前SAV後Coupe」嘅Design；呢個設計將X5嘅車頭，同Coupe跑車嘅車尾結合起嚟並作修飾，隨後以極具活力嘅形象示人。當中車頭部份保留有X5原有嘅剛強霸氣，大可從極具肌肉感嘅車身線條略知一二；至於車尾，則用上Coupe跑車專用嘅斜尾線條，而車窗同尾燈之間更特別採納具有穩壓作用嘅鴨尾式設計，襯埋19吋超大胎軨，加上較高離地距，絕能將SAC糅合SAV同Coupe跑車嘅特性表露無遺。
跳上車後，反而覺得車廂陳設無太大新意，整體感覺同X5相似，尤其係中控台部份，更可以話係一模一樣；不過，值得一提係佢嘅後座，由於新車用咗Coupe車尾設計，所以後座只可容納兩名乘客，同時可佔用嘅空間唔多，生得高大嘅乘客或會感到侷促。可幸嘅係，尾廂空間卻得到提升，有需要的話可將後排椅背放平，從而令容量由570公升增至1,450公升，想擺幾多行李都得。
a.頭泵把有多個超大生風導入口之餘，另外仲加有車底引擎保護板。
b.由於加入咗動態性能控制系統（DPC），即使喺盡濕嘅路面上激劈，都唔怕會甩出去！
c.唔只鴨尾狀車尾話你聽佢跑得，就連左右超大尾喉都有同等功效。
d.駕駛席嘅鋪排，令人有同X5一脈相承嘅感覺。
e.車內座椅全以高級真皮鑲嵌，當中少不了電控調校。
f.中控台設備齊全，波棍旁嘅旋鈕用嚟控制i-Drive系統。
g.由於採用Coupe跑車嘅設計概念，後座僅可容納兩人，而空間亦略嫌不足。
h.尾廂最大容量達1,450公升，擺放大量行李都不成問題。
濕地激劈 隨時甩尾
嚟到LaurensProvingGrounds，一眾傳媒要揸車以高速喺被花灑噴濕嘅直路上飛馳，隨後更要喺彎路激劈；過程相當驚險，稍有差遲就會即場表演拓海上身，大玩甩尾……
狂衝轉線 小心碰樽
玩完濕地，就要喺賽道嘅另一邊先以高速行車，然後要避過前方雪糕筒走Slalom；若心急早扭軚，就會好容易撞到佢哋，失敗收場㗎啦！
試車過後，閒逛紐約……
BMWX6xDrive50i規格
引擎：4,395c.c.V8DOHC配TwinTurbo
馬力：407bhp/5,500-6,400rpm
扭力：600Nm/1,750-4,500rpm
傳動：6前速Steptronic半自動波，四輪驅動
尺碼：4,877×1,983×1,690mm
軸距：2,933mm
車重：2,265kg
0-100km/h：5.4秒
極速：250km/h
查詢：BMWHK（27145271）