大市噚日喺和黃（013）升勢帶領之下，跌幅由超過300點，收窄至只有20點，雖然股民普遍認為和黃係港股「藍燈籠」，會影響恒指向下，嘉賓就認為呢個情況只係因為市場欠缺方向所至，估計港股要到6月先會有突破。
玲：楊慧玲 康：黃偉康 耀：郭家耀
玲：和黃上星期突然大升，升咗兩三日之後，股市開始大跌，有人話佢係大市「藍燈籠」；不過，今日喺大額成交配合之下，佢今次升幅亦非常大，咁後市點睇呢？
搵「指數股」托市
康：和黃成為「藍燈籠」機會係有嘅，主要因為喺大市接近26000點時欠缺方向，市場會搵番啲「指數股」去托住個市，短期和黃上升對港股不利。不過，我覺得大市升勢未完結，因為未見到有大升或者大跌因素，所以5月份港股可能係25000至26000點水位牛皮，6月份先會有較大突破出現。
玲：大市嚟緊係唔係真係會牛皮？
耀：個市的確係缺乏方向，因為第一季業績已經差唔多出晒，推動股價嘅消息比較缺乏，板塊都係各自去炒，例如內房股比較落後，但係航運股會比較理想，我估計指數波幅唔會太大。不過，唔同板塊會有唔同表現，好似災後重建概念股份，走勢應該比較好，但係內房股短期可能會比較受壓。
係時候 追落後
玲：航運股升勢好好，睇到中海集運（2866）升勢好好，除咗波羅的海指數造好之外，仲有無其他因素令佢超越其他股份？
耀：睇番啲航運股，中海發展（1138）等已經升咗好多，而中海集運落後過呢啲股份好多。近期全球經濟被市場睇番好，集裝箱使用率都好咗，所以𠵱家佢係追番落後。
中信資源$4.8有沽壓
林小姐：我𠵱家留意緊隻中信資源（1205），佢近期發現咗油田，高盛又調高咗佢目標價，入唔入得過？
玲：佢短期又會唔會有爆發力呢？
耀：做上游業務嘅股價好堅挺，我比較睇好，例如中海油（883），而中信資源主要係做上游開採，我都覺得佢值得睇好，加上佢估值都唔算貴，4蚊邊入，可以上望5蚊甚至6蚊。
康：雖然中信資源今年會有盈利入賬，令佢市盈率下調，但中信資源如果上到4.8蚊左右，就會有壓力，估值亦會變得貴，所以唔應該對佢有太大期望。
《荃灣林小姐建議》
建議買入價：現價
目標價：6.2元
止蝕價：－
時期：長期
首國有機升破三蚊
方小姐：我想問下隻首長國際（697）。
玲：黃偉康之前都推介過呢隻股份，喺呢個時候，應該繼續持有定係放貨好呢？
康：首長國際比起其他鋼鐵股落後，佢一直受制於2.9蚊呢個阻力位，但係我覺得佢今年盈利增長動力仍然比較強，市盈率仍然係10倍樓下，佢有機會上返3蚊至3.2蚊呢啲水平，所以可考慮去到3.2蚊呢啲位先沽出，我覺得仲可以持有。
方小姐：我𠵱家未有貨，恒指去到乜嘢位，先入呢隻股份好呢？
康：我建議方小姐可以等恒指去到25000點水平入貨會比較安全，相信首長國際短期會有個強勢出現，有機會冲穿3蚊，不過水位未必係咁足夠，可以等佢跌返去2.6蚊個啲位，股價鞏固咗先買入。
《新加坡方小姐建議》
建議買入價：現價
目標價：3元
止蝕價：－
時期：兩個月
生不逢時 SOHO坐住先
陳先生：SOHO中國（410）IPO嗰時我買咗一手，佢成日都跌，升到11蚊我冇走到，諗住長揸。點知股價一直跌，到𠵱家都冇升返上去，點算好？
玲：隻股真係生不逢時，上市冇幾耐，成個內房股板塊就全線下跌，佢未來展望會係點呢？
康：北京樓價唔係咁差，但係深圳方面樓價持續下跌，內地樓市有機會都向北，係擔心唔夠實力嘅地產商減價賣樓情況，影響盈利，所以要內房股有反彈，真係比較困難。不過，SOHO中國做商廈為主，影響應該冇咁大，你要佢有顯著反彈，中線5蚊會有阻力、4.5蚊有支持，未來6個月都會喺呢個區間徘徊。
耀：內房股長線我都幾睇好，SOHO中國冇資金斷鏈嘅問題，短線要見番8個幾水平，機會雖然好低，若你坐得都坐一坐先，長遠有機會上返你買嗰啲水平。
《紅磡陳先生個案》
買入價：8.3元
目標價：－
止蝕價：－
時期：長期
中交PE高難發圍
莫先生：我想講吓中交建（1800），我喺一年前買咗一注，見佢16蚊低位嗰時又買多一注，我想問嚟緊呢兩個月可唔可去到23蚊？
耀：我本身都睇好基建股，除咗災後重建概念，中央都好推動基建發展，而中交建毛利率亦比其他基建股好，成本控制又做得比較突出，值得中長線持有，就算去到20蚊水位都值得繼續揸落去。
玲：中交建可唔可以喺基建股當中突圍而出呢？
康：我自己反而冇睇得咁好，國際基建股冇一隻平均市盈率會超過20倍，中交建仲係超過呢個水平，估值唔吸引。內地基建股呢幾年已經有好高速增長。我擔心佢全年業績唔理想，如果上唔到19.5蚊，佢有機會試多次16蚊個啲低位，先確定見咗底。
《馬鞍山莫先生個案》
買入價：16元
目標價：23元
止蝕價：－
時期：兩個月
每日收市後4:30pm
歡迎click入 http://finance.appledaily.com以webcam參與節目及收看
今日嘉賓：亨達集團研究部董事黃敏碩
歡迎phonein28698262暢談心得
亦可email至mailto:[email protected]搶先貼股