李彩華、董敏莉、梁俊一在亞視劇集《火蝴蝶》中感情關係錯綜複雜，引發愛恨情仇，在現實生活中，各人對愛情的看法也不一樣，雖然李彩華入行以來緋聞不絕，但是她仍然盼望得到真愛，更加不希望做一隻火蝴蝶，同時捲入兩兄弟的感情漩渦。
拍完亞視重頭劇《火蝴蝶》之後，李彩華覺得自己長大了，她說：「感受好深，拍完之後，覺得做人唔簡單。」劇中主角關係混亂，李彩華周旋在哥哥學儒（唐文龍飾）及弟弟學禮（梁俊一）之間，不過，現實生活中的李彩華，不會令自己的感情複雜，她說：「我係一個傳統道德觀念很重嘅女仔，我未試過同兩兄弟一齊，亦唔會試，我好清楚自己要乜嘢，所以唔會好似套劇咁亂。」
董敏莉苦戀梁俊一
在劇中的李彩華嫁入豪門爭身家，不知李彩華有沒有想過好像徐子淇一樣，嫁入豪門。她說：「我自己冇諗過，但係為子淇感到開心，記得以前一齊做model嘅時候，成日要減肥，但係我哋都好鍾意一齊偷偷哋去食嘢，𠵱家見到佢有幸福生活好開心，大家都為咗目標而奮鬥。」
扮演李彩華妹妹的董敏莉，在劇中對梁俊一由憐生愛，令兩兄弟加兩姊妹的愛恨更複雜，董敏莉認為自己性格固執，絕對不可能混亂，她說：「我唔可以接受咁混亂，我需要感情專一同簡單，同埋我會控制對方，就算係朋友我都一樣，有次我朋友一腳踏兩船，我就同佢講唔可以咁，佢冇處理好，我就同佢絕交。」
抗拒兄弟同愛一人
至於演唐文龍弟弟的梁俊一，他表示自己年少時感情多姿多采，但現在已經28歲，不會再花弗，他說：「𠵱家大咗，唔會再好似以前咁，會成熟處理感情事，不過點都唔可以接受一個女仔同我哥又同我一齊。」
採訪：楊潔雯
攝影：陳順禎
梁俊一服裝：Kitterick
董敏莉服飾：Rosebullet、Pentacle
