四川7.8級大地震，震撼全球，演藝界人士迅速行動，發起賑災，榮雪梅的家鄉正是四川，她在當地的大宅幸未受摧毀，故借出給失去家園的親友避難，但多位舅父音訊全無，令母親擔心得以淚洗面。蔡少芬則獲住在重慶的老爺奶奶報平安，但她仍為其他災民擔心。
榮雪梅前晚出席在君悅酒店舉行的家居雜誌頒獎禮時心情沉重，皆因為災區的親友徹夜難眠，災民一夜間失去所有，她又擔心餘震，她說：「本來呢段時間會回鄉探親，點知發生地震，若然真係返去唔知自己有冇命返嚟，𠵱家海陸空交通都中斷晒，令人好擔心。」榮雪梅在家鄉四川建有一所大宅，於是安排無家可歸的親友入住其未受地震影響的大宅，她說：「大宅個花園可以容納50幾人，佢哋已經住咗入去，不過連帳篷都冇晒。」
「嗰邊滿地屍體」
昨日榮雪梅再接受電話訪問時仍憂心忡忡，她指母親終日在家以淚洗面，她說：「媽咪嘅幾個哥哥，即係我嘅uncle，到𠵱家都未有消息，乜嘢情況都未知，媽咪而家喺屋企仲喊緊。」她又說：「我十幾年冇見過uncles，但媽咪係骨肉情深，噚日打咗好多電話都唔通，𠵱家冇晒消息音訊，除非去到當地，唔係都唔知點。𠵱家爹哋發散啲朋友四圍聯絡，仲搵咗軍人朋友去當地搵。」她續說：「聽講嗰邊滿地屍體，噚日又暴雨，成都嗰邊又話搶水搶糧，媽咪睇到仲擔心。」榮雪梅表示暫時不會捐錢予慈善機構，她說：「我要留啲畀親友，希望大家平安之後，到時幫佢哋起屋，重建家園。」
蔡少芬夫家平安
蔡少芬丈夫張晉的老家位於重慶，得知老爺奶奶平安無事後，昨日她在網誌中向四川災民寄語祝福，她說：「看到電視的報道、看到房子毀損，家人也壓倒，真的好心痛！但願這次地震死傷人數不要再往上升。」
此外，米雪昨日出席在東港城舉行的賑災活動，她說：「我哋幾個朋友都有諗過去受影響地區探訪，但係佢哋有好多賑災工作籌備中，而且都覺得𠵱家唔係合適嘅時候，情況穩定再決定。」米雪又說：「我有好多朋友喺四川、重慶同雲南，好彩大家都冇事，仲聯絡得到。」至於鄭伊健昨日到中環出席活動時則說：「我返嚟香港至知地震，今次活動嘅酬勞會捐出嚟當少少心意。」
採訪、攝影：何慧斯、林妙萍、藍文浩、陳慧安
