出得嚟行，求大俠最欣賞義氣仔女，好似深得人心嘅耆老軒歷拿臣就無懼批評，一而再嘅食言，以36歲高齡3度重返瑞典國家隊，希望助呢隊「老弱孱兵」喺歐國盃踢出艷陽天！
「禮拜一，拉格碧（瑞典教練）打畀我，咁啱我打緊高爾夫球，返屋企聽留言信箱，覺得佢好有誠意想我踢歐國盃，於是我馬上答允。」就係咁，兩囗插刀嘅拿臣第3度重踏國際舞台，出腳拯救瑞典於水深火熱，佢接受電話訪問時話：「我知道要爭正選有困難，但我會以此為目標。」
球迷唔好以為搞噱頭，拿臣只係額頭鑿住「謙虛」二字，唔係齋擺，甚至有機正印；事關瑞典目前備受傷兵困擾，防中連達路夫、龍格保受傷照樣入選，資深國腳欠奉，而唔計「十字軍」伊巴謙莫域，陣內只得級數一般嘅羅辛貝治、艾文達同老將柯碧克，你話佢點可以見死不救呢？
瑞軍傷困「後」勁不繼
06世盃後宣告退出國家隊，拿臣專攻球會級賽事，原意係畀機會後輩上位，點知呢期瑞典「後」勁不繼，教練拉格碧亦𢱑晒頭：「去屆希爾星堡有份踢歐協盃，我已留意緊拿臣，知道佢仲係老馬有火，享受足球樂趣。」只要冇乜大傷，睇拿臣個款踢到40歲都仲得，而23人歐國盃名單亦非常大路，如門將伊沙克臣，中場卡斯唐、美爾保等。
講真，拿臣呢啲義氣仔女，今日已成稀世珍品，求大俠知道佢𠵱家仲定期返蘇格蘭，探望以往同佢喺些路廸共事嘅私人教練；佢上季為曼聯踢嗰3個月，迄今令人難忘，之後堅持返母會希爾星堡度過黃昏歲月，唔服佢都唔得！瑞典喺D組與西班牙、希臘和俄羅斯同組，出線不易，但願拿臣復出有價值啦！
瑞典有老將「獻身」，但施多夫就就拒絕為荷蘭「分身」，但事件有玩嘢成份。事緣教練尹巴士頓宣佈「西多」入選初選大軍之後，佢突然又話唔玩，退出國家隊，唔通怕咗新兵法米尼會威脅其AC米蘭嘅地位？