中國人口眾多，同名同姓嘅人自然唔少，不過，如果你個名，同位爆出醜聞嘅名人相似，就幾麻煩。就好似擁有市值逾百億元嘅涌金系、兼任旗下國金證券董事長嘅魏東，之前離奇自殺，內地傳媒廣泛報道，事件同中央出手調查股改同證券借殼上市，造成利益輸送有關。
他來自華寶興業
華華做傳媒好清楚，講乜都假，最緊要有張相。既然報道魏東自殺，點可以連一張魏東相都冇。但報館係冇就冇，做記者編輯嘅惟有用盡所有渠道搵。科技發達，上網搵最快捷。
結果就係因為咁出事，大陸公司華寶興業基金管理噚日出咗個啓事，內容係話，已經提醒咗各位傳媒，但仍然有兩家媒體喺報道涌金系魏東事件時，誤用咗佢公司位投資副總監魏東嘅相片（圖），麻煩各位搞清楚。
即係咁，你話將李華華認錯係出名靚仔嘅劉德華或者任達華，華華絕對冇意見，但將仍然在生嘅人，錯認係有醜聞兼已故嘅名人，淨係出份聲明，都算客氣咯！