去年轉投東亞唱片的劉浩龍，差不多兩年沒出碟，前晚亮相《蘋果》網站直播節目《娛樂開CHAT》接受主持懷鈺訪問，他大方提到緋聞女友鄭融，他說：「佢係我好朋友，做好朋友係一生一世。」他坦言現在要積極搵老婆，而非女友，他續說：「我唔細喇，身邊個個朋友都結婚生晒小朋友，我唔想到時見到我個小朋友大個之後，我都老喇！」大家可登入《蘋果》網站 http://ent.appledaily.com隨時重溫節目。採訪：葉雪
攝影：葉君海
髮型：劉浩龍：Jay（Orient4）
懷鈺：MattChiu（XENTERJUT）
盼新秀舊生大合唱 觀塘Lemon
Lemon：想問吓你轉咗新公司之後，同楊千嬅、Sammi（鄭秀文）等，會唔會有機會合作呀？
劉浩龍：千嬅、Sammi、阿詩（何韻詩）同安仔（許志安）都係華星嘅一班成員，大家都係參加新秀出嚟嘅，我哋好希望可以唱一隻大合唱嘅歌，因為好耐都冇一隻咁嘅大合唱歌，又覺得好有意思，好似一個舊生會唱一隻歌咁。
Lemon：你會唔會想有新嘗試呀？
劉浩龍：其實我應承咗啲朋友，就係我喺好番隻腳後，開始學跳舞。上次同Sammi走埠時，佢鼓勵我，話我係獅子座好有毅力，應該可以跳舞，梗有一隻舞啱我。
經歷低潮被嘲折墮 長沙灣Connie
Connie：入行以嚟有乜嘢係唔開心㗎？
劉浩龍：有㗎，不過𠵱家睇番就已經係小事啦，記得以前仲未有機會出碟，都會有一啲比較冷言冷語啲嘅時候，嗰陣時拍嘢做一個叫火槍隊隊長，冇名，嗰日好凍，埋位拍完之後，個導演突然間指住我問「你咪就係兩年前新秀冠軍？乜你咁折墮？」呢件事係比較深刻，但𠵱家睇番就得啖笑喇。
