四川大地震，李嘉誠基金會第一時間捐錢救災，做下屬又點可以慢，長實（001）執董趙國雄話，一知道件事，即刻全家總動員一齊捐錢，佢仲趁食晏嗰陣親自走咗轉去獅子銀行，私人入咗6位數嘅善款落個賑災戶口。
8月上京睇奧運
佢話除咗捐錢之外，最大嘅幫忙，就係暫時唔好去當地，費事人多手腳亂，幫唔到忙仲要搵人招呼你。
雖然話暫時唔好去四川成都，但趙國雄就會喺8月上京。冇錯，以趙生人面咁廣，點會撲唔到奧運會門票。趙國雄話，已經落實拎到炒到飛起嘅奧運開幕禮門票，所以8月8日會親身到會場，計埋阿特蘭大、悉尼，今次係佢第3次現場睇奧運。