沙田火炭「御龍山」開賣，聽講情況熱烈，銷情極佳。呢個何東樓地盤經營咗幾年，料可為信和、港鐵賺上一百億元以上，對本對利，幾好搵㗎。呢個豪宅盤之最好處就係位於火炭火車站對面，坐火車去新城市廣場或中文大學，約三分鐘，去到尖東，十七至十九分鐘，揸車去馬場只需五分鐘。
最大唔好處呢，就係太接近吐露港公路。沙田陳師奶睇咗一輪如排山倒海之「御龍山」（ThePalazzo）廣告攻勢（《蘋果》獨冇，唔怪得肥佬黎曾經講過《蘋果》受到政治歧視，每年損失廣告二億幾元），盛讚廣告設計。陳師奶話：「啲設計師真有創意，我住在沙田咁耐，睇咗幾輪廣告，都唔認得城門河、吐露港、馬場等等有如斯美景嘅，成個御龍山地盤位於一千米跑道起點對面，對面有馬伕宿舍，隔籬與銀禧花園貼近，地盤向山景望住火炭工業大廈，地盤住宅向馬場嘅，除咗第八座打起，與地面吐露港公路成九十度角，住響度開窗一定嘈死。」
廣告創作可以係憑空創作，將最好嗰一面呈現出嚟，唔好嗰面，你自己去現場睇真吓啦。壹傳媒嘅創辦口號係不扮高深，只求傳真，《蘋果日報》啲地產記者不妨寫多啲真正嘅樓盤傳真，唔好學一啲收地產廣告收到盤滿缽滿嘅傳媒寫樓盤傳真。香港難得有一張報紙全無新樓盤地產廣告嘅，咁都唔發揮吓監察作用？
寫到呢度，收到《蘋果》傳來讀者要求澄清信。呢類澄清信件原來在處理上好認真，除咗交畀作者之外，副本要送交董社長，林副社，鄭總編，蕭執總，副刊，會客室，差啲未交畀肥佬黎啫。咁大陣仗，左丁山為之一驚，雙手揸住，捧讀一番，哦，睇完就冇咁驚。此函來自GrantThornton（均富），話要澄清四月四日（來函日期係五月六日）本欄稱會計師龔耀輝為「前GrantThornton合夥人」。現在均富來函正式聲明，龔耀輝先生為均富會計師行「前企業融資部總監」，而並非本行之「前合夥人」。好吖，大家知道嘞，以筆名方卓如揚名之龔耀輝在專業會計界並非晉升至合夥人（partner）之地位，仲差啲啲。多謝均富澄清！