香港先生出身的大隻佬鄭健樂（Rocky），憑其42吋巨胸和18吋手瓜而令觀眾留下深刻印象，雖然Rocky外表粗獷，但內裏卻細心體貼，日前記者見他抱着幾個月大B仔到銅鑼灣睇醫生，見Rocky細心抱着B仔探熱磅重，盡顯慈父本色。
現年40歲的鄭健樂，05年獲選為首屆香港先生健力組冠軍後加盟無綫，由於他是健身教練出身，一身結實肌肉經常大派用場，不是被無綫派演大隻佬角色，便是在籌款節目中扮演大力士騷哥利，雖然多年來星運平平，但其大隻佬形象卻叫人留下深刻印象。原來，結婚7年的Rocky，早前已榮升爸爸，日前記者更發現他抱住B仔到銅鑼灣睇醫生。
乖巧冇扭計
上周六下午1時許，記者在銅鑼灣恒隆中心陳仕文醫生醫務所碰見Rocky，陳仕文為著名的兒科醫生，記者在醫務所內看見Rocky抱着幾個月大的B仔與太太一起為兒子探熱和磅重，現場還有兩個傭人陪伴左右，認真大陣仗。探熱及磅重後，Rocky便與太太帶同B仔見醫生，見B仔不但長得精靈可愛，且還十分乖巧，未見他扭計或哭哭鬧鬧。
在Rocky及太太帶B仔睇完醫生等候付款期間，有家長好奇問BB究竟是男是女，Rocky太太即友善地說：「係仔嚟㗎。」
接着在場又有家長大讚B仔又乖又得意，也有人認出Rocky是藝人，指他的B仔跟他一樣長得大大隻十分精靈，Rocky聞言以笑回應，一副幸福滿足模樣。記者昨日致電Rocky，他表示當日只是帶兒子打防疫針，談到初為人父心情，Rocky相當興奮地說：「當然開心啦，個仔四個月大，英文名叫Owen，初出世嗰陣重7磅11安士，𠵱家有成9公斤（約19.8磅），都幾重㗎。」。
採訪、攝影：苗菁
