好多散戶買股由於短炒變長揸，所以喺每年一次嘅股東大會都會「化悲憤為食量」，有見及此，近年好多「體貼」小股東嘅上市公司，為免出現混亂場面，都會事先分好包起啲點心，等小股東拎返屋企慢慢享用。
不過，舊年下半年先至上市嘅SOHO中國（410），噚日第一次開股東大會，久遺嘅場面又再出現。唔知係咪第一次喺香港開股東會，所以沿用傳統方式，由舉辦股東會嘅酒店捧上一碟碟點心，任由小股東自助式享用。
可能受到前日長洲太平清醮搶包山嘅影響，散戶見到點心都有搶包山嘅衝動，侍應未將食物捧埋枱，已經被一班「健兒」搶去。排外圍嘅散戶搶唔到投訴，要求按𠵱家最流行同公平嘅做法，每人派一張食物票，然後領取食物盒一份。華華義不容辭為民請命，同SOHO中國董事長潘石屹反映。
訪商品交易所 陳家強夠貼市
財經事務及庫務局局長陳家強去美國推介香港，近排商品價格飆升，陳局長（左二）參觀當地商品交易所，足見市場觸覺敏銳。今趟出訪，11號去17號返，行程緊密。
政府新聞處圖片
特首吩咐 金管局識做
舊年10月，曾特首喺施政報告倡議開發本港成為伊斯蘭債券市場嘅平台，金管局當然要做嘢，日前就聯同財資市場公會、貿發局，喺杜拜同安曼搞咗「香港伊斯蘭金融推介會」。由身兼財資市場公會理事會主席嘅金管局副總裁余偉文（左）帶隊，同中東人士交流。
