崔健邦和唐詩詠這對緋聞情侶，早前曾傳分手，其後卻被拍到出雙入對，不過他們對戀情依然三緘其口。前晚崔健邦參與《獎門人》錄影，唐詩詠竟不避嫌現身監場，兩人隨即成為被玩對象，錢嘉樂稱唐詩詠為「阿嫂」和「崔太」，令她十分尷尬。
崔健邦、黃泆潼、李綺虹、陳錦鴻、胡蓓蔚和EO2的Eddie前晚到將軍澳電視廣播城錄影《鐵甲無敵獎門人》，玩掟忌廉環節時，崔健邦的緋聞女友唐詩詠突現身觀眾席，曾志偉見狀即暗寸崔健邦說：「呢個時候崔健邦應該好緊張，因為有屋企人喺現場。」之後錢嘉樂更捉唐詩詠出來笑稱她做「阿嫂」和「崔太」，唐詩詠即表現得很尷尬，只有儍笑。
贏獎金搞婚禮
之後玩另一部份遊戲時，錢嘉樂又玩崔健邦，他笑說：「你要畀心機，如果贏咗12萬獎金，你就夠錢同唐唐搞婚禮！」崔健邦即詐儍扮懵當聽不到。另外，黃泆潼和Eddie玩「人肉呼拉圈」時，黃泆潼笑問Eddie：「你想前定後？」志偉隨即大爆有味笑話：「我唔知佢平時咩嗜好，鍾意前定後喎？」當Eddie狂轉黃泆潼時，她多次露出股罅，志偉和錢嘉樂出手幫她拉高褲頭遮住。
黃泆潼呻蝕晒
事後問到黃泆潼走光，她愕然地說：「吓，我走光咩？我真係唔知，我已經着件長啲T恤諗住安全啲，唔好意思，贏唔到仲要走光真係蝕晒！」對於有雜誌指《獎門人》日前到馬來西亞錄影，被指為「淫賤團」，志偉笑說：「黐線，睇人點睇，我就覺得只係遊戲。」
此外，李綺虹昨日去到新城電台接受訪問表示，她正考慮領養一名小朋友，與3歲半的囝囝作伴，她說：「我原先想生多個女，湊成一個好字，但係自己已經試過十月懷胎，𠵱家又要工作，所以想領養一個一、兩歲嘅小朋友返嚟。」
採訪：何慧斯
攝影：林德雄
