Audi做咗北京奧運贊助後，人人目光都集中喺S8、A8呢類豪轎，但我嫌悶，反而念念不忘大牛龜Q7，唔係想嘆佢嘅豪華設備，而係想揸住呢架百萬四驅，喺大沙場狂扭猛片，嗰種毫不憐香惜肉近乎變態嘅放肆，真係揸車都可以揸出高潮。蹂躪過後，冷靜回望，大鑊！Q7全身沙泥雜草，正盤算點同靚女PR交代，好彩測試組同事自告奮勇話：「咁污糟？等我搞掂佢啦。」
記者：徐影龍、彭偉順
攝影：梁細權
Model：Creamy
人好自私，自己架Corolla莫講話掟彎，連直路都錫住踩油，家陣有部AudiQ7任我舞，枱面說話係為讀者試盡百萬四驅車，心底話係好難得有架貴車俾我狂劈，下下急停狂扭S彎，連跟車同事都問：「乜車行俾你咁劈法？」
Q7用4.2FSI引擎推動quattro四驅系統，好多人只會被佢威猛外形同豪華內裝感動，咁樣實在太膚淺喇。Q7好玩在四驅系統同埋自行升降嘅靈活懸掛。我試到佢盡，一起首揸呢架大牛龜穿過欄杆左屈右拐入大沙場，初頭以為有難度，好彩車身高睇位準，三兩下手勢捐到入去，攝影師攞好位，準備就緒，Go！
喪扭隱形雪糕筒
開車，Model坐我隔籬，兩位測試組同事唔知碇跟車，我壞心腸，想狂掟彎掟到佢哋驚為止。一開波，地台油發力狂飆二、三百米，臨近草地急煞，扭軚U番轉頭，quattro好掂，沙地狂飆好咬地，唔會因動力消失而失控，只嫌有少少「波Out」同震得好辛苦。
狠劈幾圈，測試組同事開始適應，懶得戚揮手大呼過癮，攝影師仲寸我劈唔起啲沙。氣上心頭，見到波棍下方旋鈕，猛然省起呢個掣唔係校CD，㩒一㩒可以改變六種懸掛設定，我由Comfort（舒適）轉為Off-Road模式（爛路），升高成架車後即時爽勁暴增。今勻玩隱形雪糕筒，輾過大石同泥氹依然好定，左右扭S衝向攝影師，埋到十米前先掟彎都仲得。今次出番啖氣喇，測試組彭姓同事終於頂唔順，落車猛唞大氣兼呻吟。quattro，Iloveyou！
內櫳舒服視覺悅目
𡃁仔嗰陣玩到身水身汗污糟邋遢，返屋企俾阿媽喝住冲凉，家陣輪到測試組幫Q7洗白白，兩粒鐘後架車新嘅一樣，開始靜心欣賞Q7嘅豪華氣派。豪華版換上米加黑雙色皮椅，好睇唔老土，座椅輪廓、中央手枕同軚環車上白線，添多一分典雅氣派。車身巨大自不然內櫳增大，前中排闊落唔頂腳，長腳妹坐喺我後面好鬆動，可惜後排仍屬Dogseat，15歲姨甥仔坐到嗌救命。
天幕式車頂令Q7更值回票價，前大後細設計，雖然唔係一塊過天窗，但令車廂保持開揚感，直接提升車身剛性，對講求越野功能嘅四驅車嚟講，呢點都幾重要。
AudiQ7規格：
引擎：4,163c.c.V8FSI
馬力：350hp/6,800rpm
扭力：440Nm/3,500rpm
傳動：6前速Tiptronic波箱，四驅
查詢：合廸汽車（25281862）
註：另可額外選配以下裝備——電動尾門開關（$4,000）、21"胎軨（$29,420）、S-Line套裝（$9,500）。
洗車快靚正
有人話洗車係娛樂，係呀，如果同靚女Creamy一齊洗車的話，濕身玩到成身泡，我多多車都洗呀。咪再自我陶醉兼無窮膨脹香艷畫面，做人，都係現實啲好。洗車最緊要快靚正，對準污迹，唧清潔劑，一捽一抹，甚麼泥巴灰塵雀屎統統消失，咁就最亁手淨腳。究竟邊隻清潔劑最好用？睇完以下三個測試，有答案嘞啩？
測試一：麵粉撈雞蛋，杰撻撻一大笪撻上車身，每款洗清潔劑用20毫升，大力捽50下。
測試二：唧廣告彩落車身，捽10下分勝負。
測試三：洗胎軨，睇吓Brake粉同污迹易唔易清洗。
紅威寶$28.9
家庭必備清潔劑，一樽在手，上至廚櫃下至馬桶都一樣洗得掂，洗車都一樣Work，樽身說明話對皮膚無害，放心用啦。（a）
測試一（★★★）：抹甩中間一大笪，效果一般啦。
測試二（★★★★）：捽幾下，剩番好少廣告彩，掂喎。
測試三（★★）：出盡吃奶之力先洗得亁淨，邊位仲係黑黑哋。
SHOWERKLEENER$52
講明先，呢支專For洗浴室，標榜性質溫和兼唔污染地球（好偉大！），我覺得呢隻牌子最無味，洗車亦估佢唔到咁掂。（b）
測試一（★★★★★）：中間捽甩一大笪，效果最好，勁。
測試二（★★★★★）：捽唔夠5下即甩，勁勁。
測試三（★★★★★）：海綿一掂車胎，污糟嘢自動分解，勁勁勁。
BMW洗車水$110
寫明係寶馬專用洗車水，價錢當然貴啲，顏色似橙汁，聞落有陣酸味，老實幾難聞吓。（c）
測試一（★）：洗甩好少蛋迹，點搞？
測試二（★）：點捽都仲有好多廣告彩，又點搞？
測試三（★）：可能清潔劑本身有色，冲極都好污糟。
PROSTAFF洗車水$58
日本牌子，足有800毫升，咁嘅價錢嚟講好抵用，樽身說明深色車用較佳，點解呢──呵？（d）
測試一（★★）：捽甩中間小部份蛋迹，麻麻哋Work。
測試二（★★★★）：捽足10下，捽甩九成顏色。
測試三（★★★★）：亁淨，合格有餘。
WILLSON洗車水$69
另一日本牌子洗車水，清洗兼打蠟，有防水功能，泡沫夠多更容易清洗。（d）
測試一（★★★★）：好明顯，中間洗甩一大忽。
測試二（★★★）：仲有好大笪黐喺車身，救命。
測試三（★★★★★）：又係一掂到，污糟嘢就自動洗甩。
花絮：Van仔佬炒爛拖板
預咗靚女影Bikini會多人昅，影相當日，好多拖頭司機停車猛望Creamy玩泡泡，連送貨入公司嗰個Van仔佬，都因為掛住昅女而剷爆地下拖板，之後一句唔好意思閃人。好在係拖板啫，換轉係人，相信佢一樣睇唔到。
清潔用品查詢
a.惠康
（銅鑼灣記利佐治街25-29號/25773215）
b.city'super
（銅鑼灣時代廣場地庫/25062888）
c.台日汽車用品
（旺角黑布街99-99A地舖/23924244）
d.APS
（旺角奶路臣街19號B地舖/23938384）