請朋友到家食飯，點都要有條靚魚先似模似樣。不過現在的廚具講究小巧精緻，有咁大條魚未必有咁大隻鑊，切開一半賣相不佳。怪師傅就教大家一招棟篤蒸龍脷，將大魚捲起及企身來蒸，唔怕放唔落之餘又可以原條上碟，條魚幾長都沒問題。
記者：林佩婷
攝影：伍慶泉
示範：怪師傅烹飪工作坊負責人怪師傅（http://www.masterwhy.com/）
怪師傅
從事飲食業三十五年，由於做事方式及性格古怪，故被人叫做怪師傅。最拿手煮山東豬扒及黃金蝦。
棟篤蒸龍脷
需時：20分鐘
份量：4人
選用煲仔飯豉油，因為它的醬油味較香。再加上蒸好出來的魚汁，用來混合豉油，食落更有魚味。
材料
龍脷1條、花雕2茶匙
調味：葱花2湯匙、薑絲1湯匙、煲仔飯豉油/花生油各2茶匙
做法
1.龍脷洗淨後捲成盤龍形後置於碟中。
2.水滾後將花雕灑於魚身上，大火蒸約12分鐘，蒸好後隔去多餘水份。
3.開鑊下花生油煮熱，爆香薑葱後淋在魚身上，再淋上煲仔飯豉油即可食用。
Sandy：點樣揀靚龍脷？我見龍脷個樣好似撻沙，其實點分？
答：龍脷同撻沙都係屬同一科，撻沙啲鱗粗啲；龍脷的鱗就細啲，肉質就較撻沙滑同多肉。
香草煎雞寶
需時：20分鐘
份量：4人
煎雞扒最怕外面脆裏面唔熟，記得煎時轉細火可加蓋焗煮，這樣雞扒更易熟。
材料
雞扒1件、油2湯匙
調味：吉士粉/生粉各1湯匙、蛋黃1隻、鹽1/4茶匙、糖1/2茶匙、胡椒粉少許、Oregano1/2茶匙
汁料：洋葱碎1湯匙、雞湯5湯匙、白酒2湯匙、喼汁1/2茶匙、生抽2茶匙、糖1茶匙、Oregano1/2茶匙、胡椒粉少許
做法
1.雞扒切件後下調味醃半小時。
2.開中火下油，油熱後下雞扒煎香兩面後轉細火後蓋上鑊蓋。
3.待雞扒焗熟後開蓋，再轉中火略煎一會。
4.將煎好的雞扒上碟，爆香洋葱碎後下雞湯煮滾，再下其餘汁料配料略煮一會。
5.汁料煮好後淋於雞寶上即可。
Winnie：Oregano係乜嘢？
答：Oregano中文叫皮薩草葉或直譯叫亞里根奴，係西餐中較為常用的香草，常用喺意大利菜中，例如做Pizza或番茄醬汁，一般於大型超市或烹飪學校都有得賣。
冰鎮梅子醉凉瓜
需時：20分鐘（未計冷藏時間）
份量：4人
凉瓜帶苦味，用冰鎮做法，再加入梅粉，食落有酸酸凍凍的感覺，消暑佳品。
材料
凉瓜1條、冰粒適量
調味：鹽1茶匙、梅粉1湯匙、冰糖2湯匙、水400毫升、白醋2湯匙、玫瑰露酒50毫升
做法
1.水與冰糖煮滾，待冰糖完全溶化後下梅粉及鹽略煮，然後熄火待凉備用。
2.凉瓜去籽後切薄片，下白醋及玫瑰露拌勻後，再放凉瓜片於梅子水中冷藏約半日。
3.浸好的凉瓜置於冰粒上即可享用。
Crystal：梅粉係乜？邊度買㗎？可用話梅代替嗎？
答：梅粉是梅、甘草、糖及鹽磨成粉狀的台灣產物，賣台式食品嘅地方有售。用話梅都得，做法一樣。
混醬蒜香蒸茄子
需時：30分鐘
份量：4人
泡油時要留意泡散開才代表油夠熱，這時先放茄子去炸。
材料
茄子1條、葱花適量、紅椒1條
醬料：腐乳2湯匙、蝦醬/紹酒各1茶匙、糖1/2茶匙、蒜茸3湯匙、油1湯匙
做法
1.茄子切片下鑊炸至金黃色後撈起，吸去多餘油份後置碟中。
2.紅椒去籽切碎，將醬料拌勻後淋在茄子上。
3.水滾後以大火蒸15分鐘取出，灑上葱花即可。
Mandy：用白茄子或泰國青茄子得唔得？
答：白色的茄子比常見的紫色茄子短小，由於肉質較腍，籽較少，用來蒸質感會更滑。而青茄子肉質爽甜清脆，煮得耐都可以保持爽身，但用來蒸，口感就麻麻哋！
網上重溫 http://cooking.appledaily.com